BSPનાં વડાં માયાવતીની મુશ્કેલી વધીઃ CBIએ ભરતી કૌભાંડમાં FIR દાખલ કરી

(એજન્સી) નવી દિલ્હી: લોકસભા ચૂંટણી પૂર્વે બસપાના સુપ્રીમો માયાવતીની મુશ્કેલીઓ વધી શકે છે. વાસ્તવમાં સીબીઆઇએ માયાવતી જ્યારે મુખ્યપ્રધાન હતાં ત્યારે ર૦૧૦માં ઉત્તર પ્રદેશ લોકસેવા આયોગમાં ભરતી માટે ભાઇ-ભત્રીજાવાદ અને અન્ય ગેરરીતિઓની તપાસ માટે અજાણ્યા અધિકારીઓ વિરુદ્ધ એફઆઇઆર દાખલ કરી છે અને આ પ્રકરણમાં તપાસ શરૂ કરી દીધી છે. જેના છાંટા માયાવતી સુધી ઊડી શકે છે.

અધિકારીઓએ જણાવ્યું હતું કે ઉત્તર પ્રદેશની ભાજપ શાસિત સરકારની ફરિયાદના આધારે એફઆઇઆર દાખલ કરી દીધી છે. ઉત્તર પ્રદેશ સરકારે જાન્યુઆરીમાં કેન્દ્ર સરકાર મારફતે સીબીઆઇને ફરિયાદ મોકલી આપી હતી. આ ફરિયાદમાં એવો આરોપ છે કે યુપીપીએસસીના અધિકારીઓ સહિત કેટલાક અજાણ્યા લોકોએ ર૦૧૦માં એડિશનલ પ્રાઇવેટ સેક્રટરીની લગભગ રપ૦ જગ્યાઓ માટે પરીક્ષામાં ગેરરીતિ આચરી હતી.

એવો આક્ષેપ છે કે તેમણે અયોગ્ય ઉમેદવારોને લાભ કરાવ્યો હતો. અધિકારીઓએ ફરિયાદને ટાંકીને એવો દાવો કર્યો છે કે કેટલાક ઉમેદવારોને પરીક્ષામાં લાભ પહોંચાડવામાં આવ્યો હતો. જેઓ લઘુતમ પાત્રતાનાં ધોરણોની પૂર્તતા કરતા નહોતાં.

તેમણે જણાવ્યું છે કે ફરિયાદમાં એવો આરોપ મૂકવામાં આવ્યો છે કે ર૦૦૭-૦૮માં માયાવતીના મુખ્યપ્રધાનપદ હેઠળ ઉત્તર પ્રદેશ સરકારના કેટલાક બ્યૂરોક્રેટસ દ્વારા પોતાના નિકટના સંબંધીઓની આ પદ માટે પસંદગી કરવામાં આવી હતી. તેમણે જણાવ્યું હતું કે એવો આક્ષેપ છે કે યુપીપીએસસીના અધિકારીઓએ પરીક્ષકો સાથે સાઠગાંઠ કરીને માર્કમાં ફેરફાર કર્યા હતા કે જેથી મળતિયાઓની પસંદગી કરી શકાય.

અધિકારીએ જણાવ્યું હતું કે તાજેતરમાં પણ રાજ્ય સરકારની ફરિયાદ પર સુપ્રીમ કોર્ટે માયાવતી વિરુદ્ધ ગંભીર ટિપ્પણીઓ કરી હતી. સુપ્રીમ કોર્ટે માયાવતીને હાથીઓની પ્રતિમા પર થયેલા ખર્ચનાં નાણાં પરત કરવા આદેશ કર્યો હતો.

You might also like