Stock Market: સેન્સેક્સ 150 પોઈન્ટ મજબૂતઃ નિફ્ટી 10,100ની નજીક

અમદાવાદ: રૂપિયામાં રિકવરી અને એશિયન બજારોમાં મિશ્ર સંકેતો વચ્ચે ઘરેલું શેરબજારની મજબૂત શરૂઆત થઇ હતી. બીએસઇનો સેન્સેક્સ ૨૦૦.૫૭ પોઇન્ટના ઉછાળા સાથે ૩૩,૫૪૯.૮૮ની સપાટી પર ખૂલ્યો હતો, જ્યારે નિફ્ટી ૩૭.૭૫ પોઇન્ટના ઉછાળા સાથે ૧૦,૦૬૭.૭૫ પર ખૂલી હતી.

ત્યાર બાદ સેન્સેક્સ અને નિફ્ટીમાં ઘટાડો થઇને લગભગ બજાર ફ્લેટ થઇ ગયું હતું, પરંતુ આ લખાઇ રહ્યું છે ત્યારે સેન્સેક્સમાં ૧૫૦ પોઇન્ટ કરતા વધુ ઉછાળો જોવા મળી રહ્યો છે. સેન્સેક્સ ૧૬૯.૭૪ પોઇન્ટના ઉછાળા સાથે ૩૩,૫૧૯.૦૫ પર અને નિફ્ટી ૪૭.૦૫ પોઇન્ટના ઉછાળે ૧,૦૭૭.૦૫ પર ટ્રેડ કરી રહી છે.

આજના ટ્રેડિંગમાં આઇસીઆઇસીઆઇ બેન્કના શેરમાં છ ટકાનો અને ડિવાઇસ લેબમાં ૧૧ ટકાનો ઉછાળો જોવાયો છે, જ્યારે કોટક બેન્કમાં ૨.૫ ટકાનો ઘટાડો દેખાઇ રહ્યો છે. ફાર્મા બેન્કિંગ અને ઓટો શેરમાં સારી લેવાલી જોવા મળી રહી છે. બેન્ક નિફ્ટી ૦.૫ ટકાના ઉછાળા સાથે ૨૪,૫૨૩ની સપાટીએ ટ્રેડ કરી રહી છે.

આઇસીઆઇસીઆઇ બેન્ક, ઇન્ડિયા બુલ્સ હાઉસિંગ, ડો.રેડ્ડીઝ, સન ફાર્મા, એક્સિસ બેન્ક, મહિન્દ્રા એન્ડ મહિન્દ્રા અને એશિયન પેઇન્ટ જેવા શેરમાં ૧.૬થી લઇને ૬.૬ ટકાનો ઉછાળો જોવા મળી રહ્યો છે, જ્યારે કોટક મહિન્દ્રા બેન્ક, ઇન્ડસ ઇન્ડ બેન્ક, ભારતી એરટેલ અને એચડીએફસીના શેરમાં એક ટકાથી લઇને ૨.૬ ટકાનો ઘટાડો નોંધાયો છે.

આ લખાઇ રહ્યું છે ત્યારે રૂપિયો ડોલર સામે ૦.૦૮ પૈસાના ઘટાડા સાથે ૭૩.૩૯ પર ટ્રેડ કરી રહ્યો છે. એફએમસીજી અને નિફ્ટી મેટલ સિવાય નિફ્ટીના બધા શેર ગ્રીન ઝોનમાં છે.

You might also like