Categories: Gujarat

રાજકોટમાં આભ ફાટ્યુંઃ ર૪ કલાકમાં ૧૭ ઇંચ વરસાદ

અમદાવાદ: રાજકોટમાં બારે મેઘ ખાંગા થયા છે. છેલ્લા ર૪ કલાક દરમ્યાન રાજકોટમાં ૧૭ ઇંચ વરસાદ ખાબકતાં જનજીવન અસ્તવ્યસ્ત બની ગયું છે. અનેક નીચાણવાળા વિસ્તારો જળબંબાકાર બની ગયા છે. અવિરત પડી રહેલા વરસાદના પગલે વહીવટીતંત્રને એલર્ટ કરી દેવામાં આવ્યું છે. રાજકોટ નજીકના ટંકારા, જો‌િડયા, ધ્રોલ અને ચોટીલામાં પણ અતિભારે વરસાદના કારણે ભારે હાલાકી સર્જાઇ છે. ભારે વરસાદના કારણે પ્રવર્તી રહેલી પરિસ્થિતિને પહોંચી વળવા સમગ્ર તંત્રને સાબદું કરી સાવચેતીનાં તમામ પગલાં ભરવામાં આવી રહ્યાં છે.

રાજકોટમાં ગઇ કાલ બપોરથી ધીમી શરૂઆત સાથે શરૂ થયેલા વરસાદે રાત્રે રૌદ્ર સ્વરૂપ ધારણ કર્યું હતું અને વીજળીના ચમકારા અને કડાકાભડાકા સાથે એક રાતમાં ૧૭ ઇંચ જેટલો વરસાદ ખાબકતાં રાજકોટનું જનજીવન અસ્તવ્યસ્ત બની ગયું છે. જંગલેશ્વર, કોઠા‌િરયા, રૈયા અને મૌવા વિસ્તારમાં ઠેરઠેર પાણી ભરાતાં આ તમામ વિસ્તારો સંપર્કવિહોણા બની ગયા છે.

વહીવટીતંત્રએ ઠેર ઠેર રોડ પર પાણી ભરાતાં ૧પ૦ ફૂટના રિંગરોડને બંધ કરી દીધો છે અને બીઆરટીએસ રોડ પર અન્ય વાહનચાલકોને અવરજવર કરવાની છૂટ આપવામાં આવી છે.

દ્વીચક્રી વાહનો પર ન નીકળવા તાકીદ
ભારે વરસાદના કારણે ઊભી થયેલી પરિસ્થિતિના પગલે વહીવટીતંત્રએ રાજકોટ શહેરમાં દ્વીચક્રી વાહનો પર લોકોને ન નીકળવા તાકીદ કરી છે અને કારમાં પણ બે વ્યક્તિઓ સાથે ન નીકળવા સૂચન કર્યું છે.

મેયર-નગરસેવકોને પોતાના વિસ્તારમાં પહોંચી જવા આદેશ
– અવિરત પડી રહેલા વરસાદના પગલે રાજકોટનું જનજીવન ભીંસમાં આવી ગયું છે ત્યારે લોકોને મુશ્કેલી ન પડે અને કોઇ તારાજી ન સર્જાય તે માટે સતત નજર રાખવા વહીવટીતંત્ર દ્વારા રાજકોટના મેયર અને તમામ નગરસેવકને પોતપોતાના વિસ્તારમાં પહોંચી જવા આદેશ અપાયો છે.

ભારે વરસાદના પગલે રાજકોટનાં તમામ બજાર અને શાળા-કોલેજો બંધ
એક રાતમાં જ ૧૭ ઇંચ વરસાદ ખાબકતાં રાજકોટવાસીઓ મુશ્કેલીમાં મુકાઇ ગયા છે. શહેરમાં ઠેરઠેર પાણી ભરાઇ જતાં લોકો અને વાહનોની અવરજવર લગભગ બંધ થઇ છે ત્યારે રાજકોટના વેપારીઓએ પણ આજે દુકાનો ન ખોલતાં બજાર બંધ રહ્યાં છે અને સાવચેતીનાં પગલાંરૂપે રાજકોટ શહેરની તમામ શાળા-કોલેજોને પણ બંધ રાખવામાં આવી છે.

પોલીસ કમિશનરના બંગલામાં પણ પાણી ઘૂસી ગયાં
રાજકોટના રેસકોર્સ વિસ્તારમાં આવેલા પોલીસ કમિશનરના બંગલામાં પણ પાણી ઘૂસી ગયાં હતાં. ફાયરબ્રિગેડના જવાનોએ તાબડતોબ પહોંચી જઇ પાણીનો નિકાલ કરવા માટે પ્રયત્ન શરૂ કર્યા છે.

કલેક્ટરે તાકીદની બેઠક બોલાવી
રાજકોટના કલેકટરે ઉચ્ચ અધિકારીઓની એક તાકીદની બેઠક બોલાવી હતી, જેમાં મ્યુનિસિપલ કમિશનર, પોલીસ કમિશનર, મેયર સહિતના ઉચ્ચ અધિકારીઓએ હાજર રહી વરસાદથી ઊભી થયેલી પરિસ્થિતિને પહોંચી વળવા માટે સમીક્ષા કરી હતી.

ચોટીલામાં બારે મેઘ ખાંગા
રાજકોટથી પ૦ કિ.મી.ના અંતરે આવેલા ચોટીલામાં બારે મેઘ ખાંગા થયા છે. છેલ્લા ૧ર કલાકમાં ચોટીલામાં ૧૮ ઇંચ વરસાદ ખાબક્યો છે. અવિરત પડી રહેલા વરસાદના કારણે ચોટીલામાં પણ લોકોને ઘરની બહાર નીકળવું મુશ્કેલ બની ગયું છે.

ટંકારામાં ફરી ૧ર ઇંચ વરસાદ ખાબક્યો
વરસાદના પહેલા રાઉન્ડમાં જ ટંકારામાં ભારે તારાજી ઊભી થઇ હતી ત્યારબાદ ગઇ રાતથી આજ સવાર સુધીમાં ફરી ૧ર ઇંચ વરસાદ ખાબકતાં ટંકારા જળબંબાકાર બની ગયું છે અને પરિસ્થિતિ કાબૂ બહાર થતાં રાજકોટથી રેસ્ક્યૂ ટીમ ટંકારા પહોંચી ગઇ છે. આ ઉપરાંત ટંકારામાં એનડીઆરએફ અને ફાયર બ્રિગેડની ટીમોને પણ તહેનાત કરાઇ છે. ભારે વરસાદના કારણે બંગાવડી ડેમ ઓવરફલો થઇ ગયો છે.

– જોડિયા-ધ્રોલ પંથકમાં ૯ ઇંચ વરસાદઃ એકનું મોત
જોડિયા-ધ્રોલ પંથકમાં પણ રાતભર મુશળધાર વરસાદ વરસ્યો હતો. એક રાતમાં ૮ થી ૯ ઇંચ વરસાદ પડતાં નીચાણવાળા વિસ્તારોમાં પાણી ફરી વળતાં ઝૂંપડપટ્ટીમાં રહેતા લોકોનું સ્થળાંતર કરાયું છે અને પશુપાલકોને પણ સલામત સ્થળે ખસી જવા સૂચના આપવામાં આવી છે. જોડિયાના નીચાણવાળા વિસ્તારના એક મકાનમાં પાણી ઘૂસી જતાં વૃદ્ધાનું મોત થયું હતું.

ધ્રોલ નજીકનું હડિયાણા ગામ બેટ બન્યું
ધ્રોલ-જોડિયા પંથકમાં પડી રહેલા ભારે વરસાદના કારણે જોડિયા નજીક આવેલું હડિયાણા ગામ બેટ બની ગયું છે અને લોકોનાં ઘરમાં પણ પાણી ઘૂસી જતાં વહીવટીતંત્ર દ્વારા બચાવ કામગીરી શરૂ કરાઇ છે.

અમરેલી, ભાવનગર, પોરબંદર અને જૂનાગઢમાં સામાન્ય વરસાદ
સૌરાષ્ટ્રના અમરેલી, ભાવનગર, પોરબંદર અને જૂનાગઢમાં સામાન્ય વરસાદ રહ્યો છે, જોકે આકાશ વાદળોથી ગોરંભાયેલું રહેતાં ભારે વરસાદ પડશે તેવી લોકોને આશા છે.

જામનગરમાં ધીમી ધારે વરસાદ
જામનગર પંથકમાં પણ રાતભર ધીમી ધારે વરસાદ ચાલુ રહ્યો છે, જેના કારણે વાતાવરણમાં ઠંડક પ્રસરી ગઇ હતી. ઉપરવાસના વરસાદના કારણે ઊંડ-ર ડેમ ઓવરફલો થઇ જતાં ડેમના રપ દરવાજા ખોલી નાખવામાં આવ્યા છે.

divyesh

Recent Posts

વડા પ્રધાન મોદી વારાણસીમાંઃ રૂ.ર૧૩૦ કરોડના પ્રોજેકટ્સનું લોકાર્પણ

(એજન્સી) વારાણસી: વડા પ્રધાન નરેન્દ્ર મોદી આજે સવારે પોતાના સંસદીય મત ક્ષેત્ર વારાણસી પહોંચી ગયા હતા. સૌ પહેલાં તેમણે ડીઝલથી…

17 hours ago

ગુજરાત વિધાનસભામાં નાણાપ્રધાન નીતિન પટેલે લેખાનુદાન રજૂ કર્યું

(અમદાવાદ બ્યૂરો) અમદાવાદ: ગુજરાત વિધાનસભામાં આજે નાણાપ્રધાન નીતિન પટેલે લેખાનુદાન રજૂ કર્યું હતું. લોકસભાની ચૂંટણીને અનુલક્ષી ર૦૧૯-ર૦નું પૂર્ણ બજેટ રજૂ…

18 hours ago

બેફામ સ્પીડે દોડતાં વાહનો સામે ટ્રાફિક પોલીસ-સ્પીડગન લાચાર

(પ્રતિનિધિ દ્વારા) અમદાવાદ: શહેરના એસજી હાઈવે પર બેફામ સ્પીડે વાહનો દોડે છે. ઓવરસ્પીડ માટે રૂ.એક હજારનો ઈ-મેમો આપવાની ભલે શરૂઆત…

18 hours ago

ભાજપના પ્રદેશ ઉપાધ્યક્ષના બ્લોગને પાકિસ્તાની હેકર્સે નિશાન બનાવ્યો

(પ્રતિનિધિ દ્વારા) અમદાવાદ: પુલાવામા એટેક બાદ ભારત અને પાકિસ્તાન વચ્ચે હેકિંગ વોર શરૂ થઇ ગઈ છે. ભારતીય હેકર્સે પાકિસ્તાનની ર૦૦થી…

18 hours ago

પશ્ચિમ ઝોનમાં પાંચ વર્ષના રોડના 750 કરોડનાં કામનો હિસાબ જ અધ્ધરતાલ!

(પ્રતિનિધિ દ્વારા) અમદાવાદ: મ્યુનિસિપલ કોર્પોરેશનના સત્તાવાળાઓ દ્વારા રોડનાં કામમાં ચાલતી ગેરરી‌િત સામે આંખ આડા કાન કરાય છે તે તો જાણે…

18 hours ago

પથ્થરબાજોને સેનાની આખરી ચેતવણીઃ આતંકીઓને મદદ કરશો તો માર્યા જશો

(એજન્સી) શ્રીનગર: જમ્મુ-કાશ્મીરના પુલવામામાં થયેલા આતંકી હુમલા અને ત્યાર બાદ થયેલ એન્કાઉન્ટરને લઇ સુરક્ષાદળો (આર્મી, સીઆરપીએફ અને સ્થાનિક પોલીસ)એ શ્રીનગર…

20 hours ago