બનાસકાંઠા: જિલ્લામાં બાળક ચોર સમજીને એક મહિલાને ઢોર માર મારવામાં આવ્યો. બાળકને ઉપાડવાની ટોળકી સમજીને સ્થાનિકોએ આ મહિલાની ધોલાઈ કરી નાખી છે. આબુ રોડ પાસેની આ ઘટનાનો વીડિયો હાલ સોશિયલ મીડિયામાં પણ વાયરલ થઇ રહ્યો છે. ત્યારે બાદમાં આ સમગ્ર મામલો પોલીસ સ્ટેશને પહોંચ્યો હતો અને પોલીસે આ મામલે વધુ કાર્યવાહી પણ હાથ ધરી છે.

ઉલ્લેખનીય છે કે આવી ઘટનાઓ અવારનવાર સામે આવતી રહે છે. જેમ કે ગઇ કાલની ઘટનાની જો વાત કરીએ તો મહારાષ્ટ્રમાં પણ એક એવી ઘટના સામે આવી હતી. જેમાં ધૂલેમાં બાળકોનું અપહરણ કરનારી ગેંગની આશંકાએ ત્યાંનાં ગ્રામજનોએ 5 વ્યક્તિઓની હત્યા કરી નાખી હતી. તેમજ વડોદરાનાં વાઘોડીયા વિસ્તારમાં પણ અગાઉ એક યુવકને દોરડાથી બાંધીને માર મારવાની ઘટના સામે આવી હતી. જેમાં પોલીસે 3 લોકોની ધરપકડ કરી હતી.

આ ઉપરાંત વડોદરાનાં ગજાદરા વિસ્તારમાં પણ એક અજાણ્યાં યુવકને બાળક ચોરની આશંકામાં સ્થાનિકોએ દોરડાથી બાંધીને ઢોર માર માર્યો હતો. આવી ઘટનાઓ અવાર નવાર સામે આવતી હોવાંથી આવી ઘટનાને લગતા અનેક પ્રશ્નો પણ ઊભા થાય છે કે શું આવી ઘટનાઓ જ્યારે ઘટી રહી છે ત્યારે પોલીસ માત્ર મૂકપ્રેક્ષક બનીને જોઇ રહી છે.

ત્યારે સામાન્ય પ્રજા આવી ઘટનાને વખોડી રહી છે. ત્યારે શું આવી રીતે કાયદો હાથમાં લેવો તે કેટલો યોગ્ય છે તેમજ જો આવી રીતે રાજ્યભરમાં બાળકોની ચોરી થવાંની જો ઘટના ઘટતી હોય ત્યારે પ્રશ્ન એ પણ થાય છે કે શું પોલીસ તે દરમ્યાન ઊંઘતી રહે છે. જો કે આ સમગ્ર મામલે પોલીસે વધુ કાર્યવાહી હાથ ધરી છે.