‘કેટલ ફ્રી અમદાવાદ’: તમામ ગાય અને ભેંસને ચિપ લગાવાશે

(પ્રતિનિધિ દ્વારા)
અમદાવાદ: શહેરીજનો બિસમાર રસ્તા, અપૂરતી પાર્કિંગની સુવિધાથી થતી ટ્રાફિક જામની સમસ્યા ઉપરાંત રસ્તા પર ‘અઠ્ઠે દ્વારકા’ કરીને અડ્ડો જમાવનારાં રખડતાં ઢોરના ત્રાસથી ભારે પરેશાન થઇ રહ્યા છે. આ ત્રણેય સમસ્યાના નિરાકરણના હેતુસર હાઇકોર્ટે મ્યુનિસિપલ સત્તાવાળાઓ સામે લાલ આંખ કરતાં તંત્ર હરકતમાં આવ્યું છે, તેમાં પણ શહેરને ‘કેટલ ફ્રી અમદાવાદ’ બનાવવા માટે સત્તાવાળાઓએ ગાય અને ભેંસના ડાબા કે જમણા કાન પાછળ વિઝ્યુઅલ ઇયર ટેગની સાથે-સાથે બાયોગ્લાસ કેપ્સ્યૂલમાં ‌િફટ કરેલી આરએફઆઇડી (રેડિયો ફ્રીકવન્સી આઇડે‌િન્ટફિકેશન) ચિપ લગાવવાની દિશામાં ચક્રો ગતિમાન કર્યાં છે.

અમદાવાદમાં આશરે રપ,૦૦૦થી વધુ ગાય-ભેંસ સહિતનાં ઢોર છે. શહેરનો વિકાસ થવાની સાથે-સાથે ગામતળ વિસ્તારનો પણ મ્યુનિસિપલ હદમાં સમાવેશ થતો ગયો, પરિણામે રસ્તા પર રખડતાં ઢોરની સમસ્યા દિવસે દિવસે વકરતી ગઇ. ગત ઓગસ્ટ-ર૦૧૭માં હાઇકોર્ટમાં આ મામલે થયેલી જાહેર હિતની અરજીની સુનાવણી દરમ્યાન પ્રારંભથી જ હાઇકોર્ટે તંત્ર સામે લાલ આંખ કરી હતી, જેેના પગલે સત્તાવાળાઓએ રસ્તા પર રખડતાં ઢોરને ઝબ્બે કરવાની કામગીરીને વધુ વેગવંતી કરવા ‘ઓપરેશન રાઉન્ડ ધી ક્લોક’ શરૂ કર્યું હતું.

રખડતાં ઢોરની અડફેટે આવીને ટુ-વ્હીલરચાલકો તેમજ વૃદ્ધો-મહિલાઓના જીવ જોખમમાં મુકાઇ રહ્યા હોઇ સત્તાધીશોએ હવે મુંબઇની જેમ અમદાવાદને ‘કેટલ ફ્રી સિટી’ બનાવવાની કવાયત આરંભી છે. મ્યુનિસિપલ ઢોર ત્રાસ અંકુશ વિભાગ દ્વારા શહેરીજનોને રખડતાં ઢોરના ત્રાસમાંથી છુટકારો અપાવવા ગાય-ભેંસને ‘બારકોડ’ આધારિત ચિપની આગવી ઓળખ અપાશે.

ગાય-ભેંસના ડાબા કે જમણા કાનની નીચે આરએફઆઇડી ચિપ બેસાડાશે, જે ૧પ આંકડાનો કોડ હશે, જેમાં પશુના માલિકનું નામ-સરનામું અને ર‌િજસ્ટ્રેશનને લગતી માહિતીનો સમાવેશ કરાયો હશે. ઢોર ત્રાસ અંકુશ વિભાગના વડા ડો.પ્રતાપસિંહ રાઠોડ આ અંગે વધુ માહિતી આપતાં કહે છે, તંત્ર દ્વારા પ૦,૦૦૦ આરએફઆઇડી ‌િચપ, પ૦,૦૦૦ ઇયર ટેગ અને વીસ કાર્ડ રીડર ખરીદવાની પ્રક્રિયા હાથ ધરાઇ છે. શહેરનાં આશરે રર,૦૦૦ ઢોરનું ર‌િજસ્ટ્રેશન થયું છે, જે માટે તંત્રને ૩૦૦૦ જેટલી અરજી મળી હોઇ તેના આધારે તંત્રની ટીમ ઘરે-ઘરે જઇને ગાય-ભેંસને આરએફઆઇડી ‌િચપ બેસાડવાની કામગીરી હાથ ધરશે.

સત્તાવાળાઓ દ્વારા આરએફઆઇડી ચિપનો ડેટા ચકાસવા માટે વીસ કાર્ડ રીડર પણ ખરીદાશે. એક ચિપ માટે રૂ.૯પની તળિયાની કિંમત નક્કી કરાઇ છે, ઇયર ટેગ રૂ.૧૬માં પડશે જ્યારે કાર્ડ રીડરની કિંમત રૂ.૪ર,૦૦૦ છે. આ ચિપ બેસાડવાની સાથે-સાથે દાણીલીમડાના ઢોર ડબ્બામાં ખાસ કંટ્રોલરૂમ ઊભો કરાશે. ચિપ બેસાડાયા બાદ રસ્તા પર પકડાયેલાં ઢોરના ડેટાને તંત્રના સેનિટરી સબ ઇન્સ્પેક્ટર કક્ષાના કર્મચારી કાર્ડ રીડરની મદદથી રીડ કરતાં તેનું ફીડબેક કંટ્રોલરૂમના સર્વરમાં જશે.

આ ડેટાના આધારે ક્યા પશુપાલકનું આ ઢોર છે અને કેટલી વાર પકડાયું છે તેની વિગત જાણવા મળશે. જો કોઇ પશુપાલકનું ઢોર બેથી વધુ વખત પકડાયેલું જણાશે તો તેમની સામે પોલીસ કમિશનરના જાહેરનામાના ભંગ હેઠળ કડક ફોજદારી પગલાં લેવાશે. ઇન્ટરનેશનલ કમિટી ફોર એનિમલ રેકોર્ડિંગ નામની જર્મનીમાં હેડકવાર્ટર ધરાવતી આંતરરાષ્ટ્રીય સંસ્થાના ધારાધોરણ મુજબ ફ્રાંસની કંપની પાસેથી હાર્ડવેર-સોફટવેર સહિતની સંપૂર્ણ આરએફઆઇડીની ‌િકટ ખરીદાય તેવી શક્યતા પણ તંત્રે દર્શાવી છે.

હાલમાં રખડતાં ઢોરના કાનની પાછળ પાંચ વર્ષની ગેરન્ટી ધરાવતાં પ્લાસ્ટિકનાં ઇયર ટેગ લગાવાઇ રહ્યાં છે, હવે વધુ પ૦,૦૦૦ વિઝ્યુઅલ ઇયર ટેગ ખરીદાશે, જોકે ચિપ બેસાડ્યા બાદ રખડતાં ઢોરની ઓળખ આપોઆપ થવાની હોઇ શહેરીજનોને રખડતાં ઢોરના ત્રાસમાંથી છુટકારો મળશે તેવો આશાવાદ સેવાઇ રહ્યો છે. હાલમાં તંત્ર દ્વારા શહેરના પરિમલ ગાર્ડનથી નવરંગપુરા છ રસ્તા સુધીના રોડને ‘કેટલ ફ્રી ઝોન’ જાહેર કરાયો છે તે બાબત અત્રે ઉલ્લેખનીય છે.

You might also like