સાઉથની અભિનેત્રી શ્રી રેડ્ડીએ સચીન પર ‘રોમાન્સ’નો આરોપ લગાવ્યો

હૈદરાબાદઃ ફિલ્મ પ્રોડ્યૂસર પર કાસ્ટિંગ કાઉચનો આરોપ લગાવ્યા બાદ જાહેરમાં વસ્ત્ર ઉતારીને ચર્ચામાં આવેલી અભિનેત્રી શ્રી રેડ્ડી ફરી એક વાર સમાચારોમાં ઝળકી છે. રેડ્ડીએ આ ‍વખતે મહાન ક્રિકેટર સચીન તેંડુલકર પર સનસનાટીભર્યા આરોપ લગાવ્યા છે, જોકે સોશિયલ મીડિયા પર સચીનના ચાહકોએ અભિનેત્રીની ખબર લઈ નાખી છે.

પોતાની ફેસબુક પોસ્ટમાં અભિનેત્રી શ્રી રેડ્ડીએ લખ્યું છે, ”સચીન તેંડુલકર નામની એક રોમેન્ટિક વ્યક્તિ જ્યારે હૈદરાબાદ આવી હતી ત્યારે તેણે એક સુંદર છોકરી સાથે રોમાન્સ કર્યો હતો, એમાં હાઈ પ્રોફાઇનલ ચામુંડેશ્વર સ્વામીએ મધ્યસ્થીની ભૂમિકા ભજવી હતી.”

શ્રી રેડ્ડીના જણાવ્યા અનુસાર, ”તે મહાન છે, બહુ જ સારું રમે છે… મારો મતલબ છે રોમાન્સ બહુ જ સારી રીતે કરે છે.” રેડ્ડીએ આ પોસ્ટ દ્વારા એવો આરોપ લગાવવાની કોશિશ કરી છે કે સચીનનો એક ટેલિવૂડ એક્સ્ટ્રેસ સાથે સંબંધ રહ્યો છે. શ્રી રેડ્ડીના આ આરોપો બાદ સચીનના ચાહકોએ તેને ટ્રોલ કરવાનું શરૂ કરી દીધું છે.

એક વ્યક્તિએ લખ્યું છે, ”સચીન ફક્ત એક વ્યક્તિ નથી, તેની સાથે અમારી લાગણીઓ જોડાયેલી છે.” કોઈએ રેડ્ડીની આ હરકતને સસ્તી લોકપ્રિય મેળવવાની કોશિશ ગણાવી છે. એક વ્યક્તિએ લખ્યું છે, ”ફક્ત મૂર્ખ લોકો જ તારી વાત પર વિશ્વાસ કરશે. તને સારવારની જરૂર છે.”

અન્ય એક ચાહકે લખ્યું, ”જો તારી પાસે પુરાવા હોય તો કોર્ટની સામે રાખ.” ઉલ્લેખનીય છે કે સચીન વર્ષો સુધી ક્રિકેટ રમ્યો છે, પરંતુ તેની કરિયર દરમિયાન તેના પર આવો કોઈ આરોપ લાગ્યો નથી.

કોણ છે શ્રી રેડ્ડીઃ દક્ષિણ ભારતની ફિલ્મ અભિનેત્રી શ્રી રેડ્ડી હંમેશાં વિવાદોમાં રહી છે. અગાઉ પણ તેણે પ્રોડ્યૂસર સુરેશ બાબુના પુત્ર પર યૌનશોષણનો આરોપ લગાવ્યો હતો. તેણે એક ઇન્ટરવ્યૂમાં આરોપ લગાવ્યો હતો કે સુરેશ બાબુના પુત્રએ મને સ્ટુડિયોમાં બોલાવી અને મારી સાથે શરીરસંબંધ બાંધ્યો.

એક્ટર રાણા દગ્ગુબતીના ભાઈ અભિરામ સાથે ચુંબન કરતી પોતાની તસવીર સોશિયલ મીડિયામાં પબ્લિશ કરી દીધી હતી. એ ઉપરાંત તે કાસ્ટિંગ કાઉચનો આરોપ લગાવ્યા બાદ જાહેરમાં નિર્વસ્ત્ર થઈ ગઈ હતી.

You might also like