રાજ્યસભાના ઉપાધ્યક્ષની ચૂંટણીમાં પણ એક થઈ શકયા નહીં વિપક્ષો

તાજેતરમાં રાજ્યસભાના ઉપાધ્યક્ષની ચૂંટણીમાં કોંગ્રેસ સહિત વિરોધ પક્ષો વધુ એક વખત ઊંઘતા ઝડપાઇ ગયા છે. એનડીએના ઉમેદવાર હરિવંશ નારાયણ સિંહ કમ્ફર્ટેબલ મેજોરિટી સાથે ચૂંટાયા તે પરથી એક વાત પુરવાર થઇ ગઇ છે કે વિપક્ષો વધુ એક વખત સંગઠિત થવામાં નિષ્ફળ ગયા છે.

કોંગ્રેસ સહિતના વિપક્ષો એવા આત્મસંતોષમાં રાચતા હતા કે રાજ્યસભામાં ભાજપ અને એનડીએની બહુમતી નહીં હોવાથી તેઓ કમસે કમ ચોમાસુ સત્રમાં તો રાજ્યસભાના ઉપાધ્યક્ષની ચૂંટણીનો પ્રસ્તાવ નહીં લાવે, પરંતુ ભાજપને નીતીશકુમાર અને તેમના નિકટના ખાસ સાથી ઓડિશાના મુખ્યપ્રધાન બીજુ પટનાયક તરફથી સમર્થનની ખાતરી મળ્યા બાદ એકાએક રાજ્યસભાના ઉપાધ્યક્ષની ચૂંટણી જાહેર કરી દેવાતાં કોંગ્રેસ સહિતના વિપક્ષો ઊંઘતા ઝડપાયા હતા અને તેઓને સંગઠિત થવાનો પૂરતો સમય મળ્યો નહોતો.

આ બાબતમાં નીતીશકુમારે પણ દાવ ખેલીને નવીન પટનાયકને ફોન કર્યો હતો અને તેમના રાજકીય પક્ષ બીજુ જનતાદળનો ટેકો માગ્યો હતો અને નવીન પટનાયકે ટેકાની ખાતરી આપ્યા બાદ ભાજપનો આત્મવિશ્વાસ વધ્યો હતો.

બીજી બાજુ આમ આદમી પાર્ટીના વડા અરવિંદ કેજરીવાલે પણ વિપક્ષો સાથે રમત રમીને મતદાન વખતે ગેરહાજર રહેવાનો નિર્ણય કર્યો હતો અને આમ વિપક્ષો સંગઠિત થઇ નહીં શકતા ભાજપ ઉપાધ્યક્ષની ચૂંટણીમાં મેદાન મારી ગયું હતું. આ અગાઉ અવિશ્વાસના પ્રસ્તાવ પર પણ વિપક્ષો વેરવિખેર જોવા મળ્યા હતા.

કોંગ્રેસ હમણાં કંઈ પણ કરે, બધું ઊંધું જ પડે છે. તાજેતરમાં રાજ્યસભાના ઉપાધ્યક્ષની ચૂંટણીમાં પણ એવું જ થયું ને કોંગ્રેસના બી.કે. હરિપ્રસાદની હાર થઇ. રાજ્યસભાના ઉપાધ્યક્ષ બનવા માટે આ વખતે બે હરિ વચ્ચે જંગ હતો. હરિપ્રસાદ સામે ભાજપે તેના સાથી પક્ષ જનતા દળ યુનાઈટેડના હરિવંશ નારાયણ સિંહને ઉતારેલા ને એ જીતી પણ ગયા.

આ જીત પણ પાછી ઓછા માર્જિનથી નહીં પણ ર૦ મતનું છે. કોંગ્રેસના હરિને ૧૦પ મત મળ્યા ને તેની સામે ભાજપવાળા હરિ ૧રપ મત લઈ ગયા.

રાજ્યસભામાં કુલ રપ૦ સભ્ય હોય છે ને તેમાંથી ૧ર સભ્ય નોમિનેટેડ હોય છે. રાજ્યસભાના વાઈસ ચેરપર્સન એટલે કે ઉપસભાપતિની ચૂંટણી રાજ્યસભાના સભ્યોના સીધા મતદાનથી થાય છે ને બાકી રહેલા રર૮ સભ્ય મતદાન કરે છે. રાજ્યસભામાં અત્યારે ભાજપ પાસે સૌથી વધારે સભ્યો છે પણ કોઈ પક્ષની બહુમતી નથી.

આ સંજોગોમાં જે પણ છાવણીએ પોતાનો ચેરપર્સન બેસાડવો હોય તેણે તોડજોડ કરીને બીજાં પક્ષોનો ટેકો લેવો પડે. રાજ્યસભામાં ભાજપ ભલે સૌથી મોટો પક્ષ હોય પણ તેના સાથી પક્ષોના થઈને પણ એટલા સભ્યો નથી કે જેના કારણે રાજ્સસભામાં ભાજપ ધાર્યું કરાવી શકે.

બલકે ભાજપની સામે લડતા પક્ષોના સભ્યોની સંખ્યા વધારે હતી. આ સંજોગોમાં ભાજપની વિરોધી છાવણીનો ઉમેદવાર જીતે તેવી શક્યતા હતી પણ કોંગ્રેસની છાવણી ઊણી ઊતરી ને પોતાના ઉમેદવારને ના જીતાડી શકી.

આમ તો રાજ્યસભાના ઉપાધ્યક્ષના હોદ્દામાં કશું કમાવાનું નથી. આ હોદ્દો શોભાના ગાંઠિયા જેવો જ છે પણ અહીં સવાલ રાજકીય પ્રતિષ્ઠા અને મુત્સદ્દીગીરીનો હતો. આ બંને મામલે ભાજપનો હાથ ઉપર રહ્યો હતો.

આ ચૂંટણીમાં હાર થાય તો તેનાથી આભ તૂટી પડવાનું નહોતું કે નરેન્દ્ર મોદી સરકાર ઘરભેગી થવાની નહોતી પણ કેન્દ્રમાં પોતાની સરકાર હોવા છતાં કોંગ્રેસનો ઉમેદવાર જીતી જાય તો ભાજપ માટે નીચાજોણું તો થાય જ.

આ નીચાજોણું ના થાય તે માટે ભાજપે મુત્સદ્દીગીરી વાપરીને આ પદ જેડીયુને આપી દીધું. તેના કારણે બે ફાયદા થયા. પહેલો ફાયદો એ કે ભાજપ પોતાના સાથી પક્ષોને સાચવવા કેટલો ઉદાર છે તેવો મેસેજ ગયો ને બીજો એ કે ભાજપનો ઉમેદવાર ઊભો રહ્યો હોત તો જે પક્ષો કોંગ્રેસની પંગતમાં બેસી ગયા હોત એ પક્ષો ભાજપના સમર્થનવાળા ઉમેદવારની પડખે રહ્યા. આ રીતે ભાજપે એક કાંકરે બે પક્ષી માર્યાં.

એનડીએના ઉમેદવાર હરિવંશને ધાર્યા કરતાં વધારે મત મળ્યા તેનું કારણ એ કે, બીજુ જનતા દળ (બીજેડી) અને તેલંગણા રાષ્ટ્ર સમિતિ (ટીઆરએસ) એ બે પક્ષોના મત તેમને મળ્યા.

કોંગ્રેસે પોતાના ઉમેદવારને બદલે બીજા પક્ષના ઉમેદવારને ઊભા રાખ્યા હોત તો કદાચ તેને આ ફાયદો મળ્યો હોત પણ કોંગ્રેસ એ શાણપણ ના વાપરી શકી તેના કારણે ભાજપને ફાયદો થયો. આનો ફાયદો ર૦૧૯ની લોકસભા ચૂંટણીમાં થશે.

divyesh

Recent Posts

એશિયા કપઃ પાકિસ્તાન સામે ભારતનો ભવ્ય વિજય, 8 વિકેટે આપ્યો પરાજય

દુબઇઃ એશિયા કપમાં આજે ટીમ ઇન્ડીયા અને પાકિસ્તાન વચ્ચે પાંચમી એવી ભવ્ય મેચનો દુબઇમાં મુકાબલો થયો. જેમાં પાકિસ્તાનની ટીમે 43…

5 hours ago

જિજ્ઞેશ મેવાણીનો બેવડો ચહેરો, કહ્યું,”ધારાસભ્યોની સાથે મારો પણ પગાર વધ્યો, સારી વાત છે”

અમદાવાદઃ ધારાસભ્યોનાં પગાર વધારા મામલે કોંગ્રેસનાં ધારાસભ્ય જીજ્ઞેશ મેવાણીએ વિશેષ પ્રતિક્રિયા આપી છે. જીજ્ઞેશ મેવાણીએ સોશિયલ મીડિયા પર પોસ્ટ કરીને…

6 hours ago

વિધાનસભા ગૃહમાં હોબાળો, નીતિન પટેલે કહ્યું,”કોંગ્રેસની અવિશ્વાસની દરખાસ્ત નિયમ વિરૂદ્ધ”

ગાંધીનગરઃ વિધાનસભા ગૃહમાં કોંગ્રેસનાં સભ્યોએ આજે ફરી વાર હોબાળો કર્યો હતો. ભાજપ વિરોધી સૂત્રોચ્ચાર કરીને હોબાળો કર્યો હતો. કોંગ્રેસનાં ધારાસભ્યો…

7 hours ago

સુરતઃ 3 વર્ષની માસૂમ બાળકીનું બિસ્કિટ અપાવવા બહાને કરાયું અપહરણ

સુરતઃ આપણી નજર સમક્ષ અવારનવાર નાની બાળકીઓ પર દુષ્કર્મ અને અપહરણ થયા હોવાનાં કિસ્સાઓ સામે આવતા હોય છે. ત્યારે આવો…

8 hours ago

નવાઝ પુત્રી-જમાઇ સહિત થશે જેલમુક્ત, ઇસ્લામાબાદ HCનો સજા પર પ્રતિબંધ

ઇસ્લામાબાદ હાઇકોર્ટે પાકિસ્તાનનાં પૂર્વ પ્રધાનમંત્રી નવાઝ શરીફની સજા પર પ્રતિબંધ લગાવી દીધો છે.નવાઝની દીકરી મરિયમ નવાઝ અને જમાઇ મોહમ્મદ સફદરની…

9 hours ago

રાજકોટઃ વાસફોડ સમાજે ઉચ્ચારી આત્મવિલોપનની ચીમકી, તંત્ર એલર્ટ

રાજકોટઃ શહેરમાં સરકાર દ્વારા ફાળવવામાં આવેલા પ્લોટની અધિકારીઓ દ્વારા માપણી ન કરવામાં આવતા વાસફોડ સમાજે આત્મવિલોપનની ચીમકી ઉચ્ચારી હતી. જો…

10 hours ago