PAYTMથી ૩૯ હજાર ટ્રાન્સફર કરી છેતરપિંડી

અમદાવાદ: વડા પ્રધાન દ્વારા ચલણી નોટો બંધ કરવાના નિર્ણય સાથે જ કેશલેસ ટ્રાન્ઝેક્શન કરવાનું પ્રમાણ વધી રહ્યું છે ત્યારે ઓનલાઇન છેતર‌િપંડીના કિસ્સાઓમાં પણ વધારો જોવા મળી રહ્યો છે. ઓનલાઇન છેતર‌િપંડીનો કિસ્સા ક્રાઇમ બ્રાંચમાં નોંધાયો છે. બેન્ક મેનેજરના નામની ઓળખ આપીને ઠગ ટોળકીએ વૃદ્ધ વેપારીના PAYTMથી 39 હજાર રૂપિયા બેન્કમાંથી ટ્રાન્સફર કરીને છેતર‌િપંડી કરી હતી

શહેરના સુભાષબ્રિજ વિસ્તારમાં આવેલ કૃપાલ વિભાગ-૧માં રહેતા અને લાકડાનો વેપાર કરતા 62 વર્ષીય વિદ્યાનંદ જગદીશપ્રષાદ ઘોષએ ક્રાઇમ બ્રાંચમાં 39 હજાર રૂપિયાની છેતર‌િપંડીની ફરિયાદ દાખલ કરાવી છે. તારીખ 16 ડિસેમ્બરના રોજ વિદ્યાનંદના ફોન પર એક કોલ આવ્યો, જેમાં કેનેરા બેન્ક સે મેનેજર બોલ રહા હૂં આપકા કાર્ડ બ્લોક હોને વાલા હૈ તો આપકે ડેબિટકાર્ડ ઓર આધારકાર્ડના નંબર દીજીએ તેવું જણાવ્યું હતું. ઠગની વાત પર વિશ્વાસ કરીને વિદ્યાનંદે ડે‌િબટકાર્ડ તથા આધારકાર્ડનો નંબર આપી દીધો હતો.

થોડાક સમયમાં વિદ્યાનંદના ખાતામાંથી 39 હજાર રૂપિયા ઉપડી ગયા હતા, જેનો મેસેજ મોબાઇલમાં આવતાં બેન્કમાં તપાસ કરાવી હતી અને ટ્રાન્ઝેક્શનનું સ્ટેટમેન્ટ માગ્યું હતું, જેમાં તમામ ટ્રાન્ઝેક્શન PAYTM મારફતે થયું હોવાનું સામે આવતાં વિદ્યાનંદે અમદાવાદ ક્રાઇમ બ્રાંચમાં છેતર‌િપંડીની ફરિયાદ કરી છે. ક્રાઇમ બ્રાંચે સાયબર ક્રાઇમ હેઠળ ગુનો નોંધીને ઠગાઇ કરતી ટોળકીઓને પકડવા માટે ચક્રો ગતિમાન કર્યાં છે.
http://sambhaavnews.com/

You might also like