BSFએ ઘૂસણખોરીની કોશિશ કરનાર શકમંદને ફૂંકી માર્યો

પઠાણકોટ: પંજાબમાં પઠાણકોટના બામિયાલ વિસ્તારમાં બીએસએફે ત્રાસવાદીઓની એક મોટી સાજિશને નિષ્ફળ બનાવી છે. આજે સવારે ભારતીય સરહદમાં ઘૂસણખોરી કરવાની કોશિશ કરી રહેલા એક શકમંદને સીમા સુરક્ષા દળોએ ફૂંકી માર્યો છે, જ્યારે તેના બે સાગરિતો ભાગી જવામાં સફળ રહ્યા હતા.

બીએસએફનાં સૂત્રોનાં જણાવ્યા પ્રમાણે ભારત પાકિસ્તાન સરહદે આવેલી તાશ ચોકીની નજીક ગાઢ ધુમ્મસનો ગેરલાભ ઉઠાવીને ત્રણ શકમંદ ત્રાસવાદી ભારતીય સરહદમાં ઘૂસવાની કોશિશ કરી રહ્યા હતા. એ વખતે સવારના ચારથી પાંચનો સમય હતો, પરંતુ ઘૂસણખોરો બીએસએફની નજરોથી બચી શક્ય નહીં.

બીએસએફના સૈનિકોએ ચેતવણી આપવા છતાં આ ઘૂસણખોરો રોકાયા નહીં અને તેથી ના છૂટકે બીએસએફના સૈનિકોને ગોળીબાર કરવાની ફરજ પડી હતી. જેમાં એક શકમંદનું મૃત્યુ થયું હતું. જ્યારે અન્ય બે ઘૂસણખોર ભાગી જવામાં સફળ રહ્યા હતા. આ ઘટના બાદ સુરક્ષા દળોએ સમગ્ર વિસ્તારમાં તલાશી લીધી હતી.

અત્રે ઉલ્લેખનીય છે કે પઠાણકોટ એરબેઝ પર હુમલા દરમિયાન ત્રાસવાદીઓ બામિયાલ વિસ્તારથી ભારતીય સરહદમાં ઘૂસ્યા હતા. આ ઘૂસણખોરી રોકી નહીં શકવાને કારણે બીએસએફની ભારે ટીકાઓ થઈ હતી. ગુરુદાસ એટેક સમયે પણ આતંકીઓએ આ જ રૂટ પસંદ કર્યો હતો. આ હુમલા બાદ પઠાણકોટ સહિત સરહદી વિસ્તારોમાં તમામ તકેદારી રાખવામાં આવી રહી છે.

You might also like