OROPના ટેકામાં વી. કે. સિંહના પુત્રી ધરણાંમાં જોડાયા

નવી દિલ્હીઃ લશ્કરના પૂર્વ વડા અને વિદેશ રાજ્યમંત્રી જનરલ (નિવૃત્ત) વી. કે. સિંહના પુત્રી મૃણાલિની સિંહ પણ આજે વન રેન્ક વન પેન્શનની માગણી સાથે પૂર્વ સૈનિકોના ધરણાંમાં જોડાઇ હતી.

મૃણાલિનીએ જંતરમંતર પર આ વિવાદાસ્પદ મુદ્દાના ઝડપી નિરાકરણની માગણી કરતાં જણાવ્યું હતું કે, તે પૂર્વ સૈનિકોના મુદ્દાને સમર્થન આપવા માટે આવ્યા છે, કારણ કે તે પોતે પણ એક પૂર્વ સૈનિકના પુત્રી છે. તેમણે ઉમેર્યું કે મને લાગે છે કે વહેલામાં વહેલી તકે વન રેન્ક વન પેન્શનનો અમલ થવો જોઇએ.

તેમણે કહ્યું કે તેમના દાદા પણ સૈનિક હતા અને પતિ પણ લશ્કરમાં છે અને કદાચ તેમનો પુત્ર પણ સૈનિક જ બને. તે પોતે પૂર્વ સૈનિકોની પીડાને સારી રીતે સમજે છે. તેમણે ઉમેર્યું કે હું આશા રાખું છું કે સરકાર આ માગણી પર વહેલી તકે ધ્યાન આપશે. આ લાંબા સમયથી પડતર માગણી છે. મેં મારા પિતા સાથે મળીને આ મુદ્દો ઊઠાવ્યો છે.

ઓઆરઓપીની માગણી સાથે પૂર્વ સૈનિકો બે મહિનાથી જંતરમંતર પર ધરણાં પર ઉતર્યા છે. જોકે આ પ્રસંગે મૃણાલિની સિંહે વડાપ્રધાન નરેન્દ્ર મોદી પર વિશ્વાસ હોવાનું જણાવીને કહ્યું કે, વડાપ્રધાન મોદી જે કહે છે, તે કરે જ છે. ઓઆરઓપીના મુદ્દા પર પણ તેઓ (વડાપ્રધાન) ઝડપથી નિર્ણય લેશે.

 

You might also like