ATMમાંથી ૧૦ હજાર ઉપાડ્યા, બેંકને જાણ કરી કે રૂપિયા નીકળ્યા જ નથી

અમદાવાદ, બુધવાર
બેન્કના અેટીએમમાંથી પૈસા ઉપાડ્યા બાદ એટીએમમાંથી પૈસા નહીં નીકળ્યા હોવાની ફરિયાદ બેન્કમાં કરીને બેન્કમાંથી પૈસા પરત મેળવી લઈ બેન્ક સાથે છેતરપિંડી કરી હોવાની ફરિયાદ અમદાવાદ સાયબર ક્રાઈમ બ્રાન્ચમાં નોંધાઈ છે. બેન્ક સાથે અા રીતે છેતરપિંડી કરી હોવાનો પ્રથમ કિસ્સો અમદાવાદમાં બહાર અાવ્યો છે. પોલીસે હાલ અા અંગે ગુનો નોંધી વધુ તપાસ શરૂ કરી છે.

અા અંગેની વિગત અેવી છે કે નારોલ વિસ્તારમાં અાવેલા એક્સિસ બેન્કના એટીએમમાંથી ૨૬ ડિસેમ્બર, ૨૦૧૭ના રોજ અેસબીઅાઈનું એટીએમ કાર્ડ ધરાવતી વ્યક્તિઅે રૂ. ૧૦ હજાર ઉપાડ્યા હતા. પૈસા ઉપાડ્યા બાદ એસબીઅાઈ તરફથી એક્સિસ બેન્કની એટીએમની હેડ અોફિસ મુંબઈ ખાતે ૨૮ ડિસેમ્બરના રોજ ડિસ્પ્યૂટેડ નાણાં અંગેની ફરિયાદ મળી હતી.

એક્સિસ બેન્કની હેડ અોફિસ દ્વારા નહીં ઉપડેલા રૂ. ૧૦ હજાર અેસબીઅાઈને પરત અાપી દેવામાં અાવ્યા હતા. થોડા દિવસ બાદ મુંબઈની એક્સિસ બેન્કની હેડ અોફિસ દ્વારા અમદાવાદની મુખ્ય બ્રાન્ચ ખાતે ઇ-મેઇલ અાવ્યો હતો કે કોઈ અજાણી વ્યક્તિઅે એટીએમમાંથી રૂ. ૧૦ હજાર ઉપાડી લીધા હતા, પરંતુ બેન્કમાં પૈસા નહીં ઉપડ્યા હોવાની ફરિયાદ કરવામાં અાવી છે.

અમદાવાદની મુખ્ય બ્રાન્ચ દ્વારા તપાસ કરવામાં અાવતાં નારોલ વિસ્તારમાંથી ૨૬ ડિસેમ્બરના રોજ અેસબીઅાઈનું એટીએમ ધરાવતી વ્યક્તિઅે જે ૧૦ હજાર રૂપિયા ઉપાડ્યા હતા તેમાં ટ્રાન્ઝેક્શન અેટીએમમાં નથી બતાવ્યું. કોઈ અજાણી વ્યક્તિઅે તે અન્ય બેન્કના એટીએમ વડે અેક્સિસ બેન્કના એટીએમમાં કોઈ છેડછાડ કરી ટ્રાન્ઝેક્શનની એન્ટ્રી ન થાય તે રીતે પૈસા ઉપાડ્યા હતા. અા અંગે એક્સિસ બેન્કના ગવર્નર બિઝનેસ વિભાગના મેનેજર રાઘવન અૈયરે સાયબર ક્રાઈમ બ્રાન્ચમાં ફરિયાદ નોંધાવતાં પોલીસે ગુનો નોંધી તપાસ શરૂ કરી છે.

સાયબર ક્રાઈમ બ્રાન્ચનાં સૂત્રોના જણાવ્યા મુજબ પૈસા નીકળ્યા બાદ એટીએમની સિસ્ટમમાંથી પાવર સપ્લાય બંધ થતો હોય છે, જેથી ક્યારેક એન્ટ્રી બતાવતી નથી. અા અંગે બેંકની ફરિયાદ મળતાં તપાસ કરવામાં અાવી રહી છે.

You might also like