લોધિકાના રાવકી ગામે ખેતરમાં ભેલાણના મુદ્દે પટેલ અને ભરવાડ કોમ વચ્ચે ધીંગાણું

અમદાવાદ: રાજકોટના લોધિકાના રાવકી ગામમાં ખેતરમાં ભેલાણ મુદ્દે ગઇકાલે રાત્રે પટેલ અને ભરવાડ કોમ વચ્ચે ધીંગાણું થતા લેઉવા પટેલ પ્રોૈઢ પર રાત્રે નવેક વાગ્યે પંદરેક ભરવાડ લોકોનાં ટોળાએ હુમલો કરી મૂઢ માર મારી તેમજ માથામાં પાઇપ ફટકારી દેતાં તેમને લોહીલુહાણ હાલતમાં રાજકોટ એસપી ઓફિસે લાવવામાં આવ્યા હતા.

પટેલ સમાજના લોકોએ તાત્કાલીક પગલાં લેવા રજૂઆત કરી હતી અને બાદમાં પ્રોૈઢને સારવાર માટે દાખલ કરાયા હતા. સામા પક્ષે ભરવાડ યુવાન પણ પોતાના પર પટેલ લોકોએ હુમલો કર્યાની રાવ સાથે દાખલ થયો હતો.

મળતી માહિતી મુજબ રાવકી ગામમાં રહેતાં કુરજીભાઇ જીવરાજભાઇ પાનસૂરિયા (ઉ.૫૦) રાત્રે નવેક વાગ્યે ઘરે હતા ત્યારે પાગા ભરવાડના છોકરા અને બીજા તેર-ચોૈદ ભરવાડ શખ્સોએ ધસી આવી હુમલો કરી માર મારી માથામાં પાઇપ ફટકારતાં તે લોહીલુહાણ થઇ ગયા હતા.

આ બનાવને પગલે પરિવારજનો અને બીજા પટેલ લોકો ભેગા થઇ જતાં ભરવાડ શખ્સો ભાગી ગયા હતા. ગામમાં આ બનાવથી દોડધામ મચી ગઇ હતી. કુરજીભાઇને લોહીલુહાણ હાલતમાં પટેલ સમાજના લોકો રાજકોટ એસપી ઓફિસે પહોંચ્યા હતાં અને એસપી બલરામ મીના સમક્ષ રજૂઆત કરી હતી.

છેલ્લાં ત્રણ વર્ષથી અવાર-નવાર ભરવાડ શખ્સો પટેલ લોકોના ખેતરમાં ઘેટાં-બકરાં-ઢોર છુટા મુકી ભેલાણ કરાવી માથાકૂટ કરતાં હોઇ આ સમસ્યાનું કાયમી ધોરણે નિરાકરણ થાય તેવી રજૂઆત કરી હતી. કુરજીભાઇને સિવિલ હોસ્પિટલમાં દાખલ કરવામાં આવ્યા હતા.

અગાઉ પણ તેમના ખેતરમાં ભેલાણ થયું હતું અને ગઇ કાલે પણ બકરાં ખેતરમાં ચરવા મૂકી દેવાયાં હતાં. જે બાબતે ભરવાડના છોકરાને ઠપકો આપ્યો હોઇ તેનો ખાર રાખી રાત્રે ઘરે ટોળું ધસી આવ્યું હતું અને હુમલો કર્યો હતો.

You might also like