Crime Brief: બસ..! એક Click અને વાંચો શહેરના ક્રાઇમ સમાચાર

કન્સ્ટ્રક્શન કંપનીમાં પ્રોફિટ કરાવવાની લાલચ અાપી લાખો રૂપિયાની ઠગાઈ
અમદાવાદ: કન્સ્ટ્રક્શન કંપનીમાં રોકાણ કર્યા બાદ પ્રોફિટ કરાવવાની લાલચ અાપી એક વ્યક્તિ સાથે રૂ. ૮૦ લાખની ઠગાઈ કરનાર બે શખસ વિરુદ્ધ કાગડાપીઠ પોલીસે ગુનો દાખલ કરી વધુ તપાસ અારંભી છે.  અા અંગેની વિગત એવી છે કે ગાંધીનગર ખાતે રહેતા મેહુલ સકરાભાઈ પરમાર છેલ્લાં ચાર વર્ષથી બહેરામપુરા ખાતે રહેતા અરજણભાઈ ઉકાભાઈ સોલંકી અને જમાલપુર ખાતે રહેતા જયંતીભાઈ રમેશભાઈ સોલંકીના સંપર્કમાં અાવ્યા હતા અને અા બંને જણાએ પોતાની મહાકાલેશ્વર કન્સ્ટ્રક્શન કંપનીમાં રોકાણ કરવા અને મોટો નફો કરાવી અાપવા મેહુલભાઈને લાલચ અાપી હતી.

મેહુલભાઈએ વિશ્વાસમાં અાવી જઈ ઉપરોક્ત બંને જણાને ટુકડે ટુકડે કુલ રૂ. ૮૦ લાખની રકમ અાપી હતી, પરંતુ કોઈ પ્રોફિટ ન અાપતાં અને પોતાના નાણાં પણ પરત ન અાપતાં મેહુલભાઈએ ઉઘરાણી કરી હતી. મેહુલભાઈની સતત ઉઘરાણી છતાં બંને શખસોએ કોઈ સંતોષકારક જવાબ ન અાપતાં છેવટે અા અંગે પોલીસ ફરિયાદ નોંધાવવામાં અાવી છે.

સાસ‌િરયાંએ પત્નીને મળવાની ના પાડતાં લાગણીવશ પતિનો અાપઘાત
અમદાવાદ: રિસામણે અાવેલી પત્નીને મળવા અાવેલા પતિને સાસ‌િરયાંએ મળવા ન દેતાં લાગણીવશ બનેલા પતિએ શરીર પર પેટ્રોલ છાંટી જાતે સળગી જઈ અાત્મહત્યા કરી લેતાં અા ઘટનાએ માધુપુરા વિસ્તારમાં ચકચાર જગાવી છે.
અા અંગેની વિગત એવી છે કે મહેસાણા જિલ્લાના કડી ખાતે રબારીવાસમાં રહેતાે લાલાભાઈ કરશનભાઈ ભીલ નામનાે ૩૨ વર્ષનાે યુવાન માધુપુરા વિસ્તારમાં સહજાનંદ કોમ્પ્લેક્સ પાછળ અાવેલ રંગાટીની ચાલીમાં શરીર પર પેટ્રોલ છાંટી જીવતાે સળગતાં તેને ગંભીરપણે દાઝી ગયેલી હાલતમાં સિવિલ હોસ્પિટલ ખાતે સારવાર માટે ખસેડવામાં અાવ્યો હતો. જ્યાં સારવાર દરમિયાન તેનું મોત થયું હતું.

પોલીસે અા અંગે ગુનો દાખલ કરી તપાસ હાથ ધરતાં જાણવા મળ્યું હતું કે લાલાભાઈની પત્ની તેના પિયરમાં રિસામણે હતી. ચાર દિવસ અગાઉ લાલાભાઈ તેની પત્નીને મળવા સાસરીમાં અાવ્યો હતો, પરંતુ સાસ‌િરયાંઓએ પત્નીને મળવાની અને વાતચીત કરવાની ના પાડતાં મનમાં લાગી અાવવાથી તેણે અા અંતિમ પગલું ભર્યું હતું.

બે મહિલાએ સોનાના દોરા ગુમાવ્યા
અમદાવાદ: વાડજમાં વ્યાસવાડી ચાર રસ્તા પાસેથી પસાર થઈ રહેલ નૈનાબહેન અનિલભાઈ પટેલના ગળામાંથી રૂ. ૨૦ હજારની કિંમતનો સોનાનો દોરો તોડી બે ગઠિયા બાઈક પર ફરાર થઈ ગયા હતા. જ્યારે મણિનગરમાં એલજી કોર્નર નજીક હેવમોર રેસ્ટોરન્ટ પાસેથી પસાર થઈ રહેલ ઉમાબહેન ચંદનભાઈ કુરુપના ગળામાંથી પણ બાઈક પર અાવેલા ગઠિયા રૂ. ૫૦ હજારની કિંમતનો સોનાના દોરો તોડી ફરાર થઈ જતાં પોલીસે તપાસ શરૂ કરી છે.

સરખેજના ગોડાઉનમાંથી ૫૦ બેટરી અને ૧૫૦ લાઈનરની ચોરી
અમદાવાદ: સરખેજના એક ગોડાઉનમાંથી ૫૦ બેટરી અને ૧૫૦ લાઈનરની ચોરી થતાં પોલીસે ગુનો દાખલ કર્યો છે. અા અંગેની વિગત એ‍વી છે કે સરખેજ- સાણંદ સર્કલ પાસે પ્લોટ નં. ૭માં અાવેલા એક ગોડાઉનમાં તસ્કરોએ ઘૂસી બારીના કાચ તોડી ટુ વ્હીલરની ૫૦ બેટરી અને ફોર વ્હીલરના ૧૫૦ લાઈનરની ચોરી કરી હતી. અા અંગે સરખેજ પોલીસ સ્ટેશનમાં હીરેનભાઈ પંચાલે ફરિયાદ નોંધાવતાં પોલીસે અાગળની કાર્યવાહી શરૂ કરી છે.

તાજાં જન્મેલા બાળકનું ભ્રૂણ મળ્યું
અમદાવાદઃ વટવા વિસ્તારમાંથી તાજા જન્મેલા બાળકનું ભ્રૂણ મળી અાવતા ંપોલીસે તપાસ હાથ ધરી છે. વટવામાં ગણેશનગર નજીક બાવળની ઝાડીમાંથી તાજા જન્મેલ બાળકનું ભ્રૂણ મળી અાવ્યું હતું. કોઈ સ્ત્રી ભ્રૂણ ત્યજી દઈ ચાલી ગઈ હોવાનું પ્રાથમિક તપાસમાં જાણવા મળ્યું છે.

દારૂ જુગારના અડ્ડા પર દરોડા
અમદાવાદઃ શહેરના જુદા જુદા વિસ્તારમાં દારૂ જુગારના અડ્ડા પર પોલીસે દરોડા પાડી ર૧૨ લિટર દેશી દારૂ, ૨૦ બોટલ વિદેશી દારૂ, ૧૪ બિયરનાં ટીન, એક રિક્ષા, એક બાઇક, રૂ.૫,૦૦૦ની રોકડ રકમ અને જુગારનાં સાધનો કબજે કરી ૨૩ શખ્સની ધરપકડ કરી છે.

તકેદારીરૂપે ૧૫૧ની અટકાયત
અમદાવાદઃ કાયદો અને વ્યવસ્થાની જાળવણીના ભાગરૂપે શહેર પોલીસે શહેરના જુદા જુદા વિસ્તારમાં તકેદારીના પગલાંરૂપે ૧૫૧ શખ્સની અટકાયત કરી લોકઅપ ભેગા કરી દીધા છે. આ ઉપરાંત દારૂના નશામાં છાકટા બની જાહેર રોડ પર બખેડો કરતા ૧૦ શખસની પોલીસે ધરપકડ કરી હતી.

અાઠ યુવતી ગુમ થતાં શોધખોળ
અમદાવાદઃ વટવામાંથી તારિકા વિક્રમસિંહ, ગોમતીપુરમાંથી જયા મકવાણા, ચાંદખેડામાંથી પૂજા સોનારા, ઈસનપુરમાંથી મુસ્કાનબાનુ શેખ, નરોડામાંથી માનસી પટેલ, ચાંદલોડિયામાંથી અંજના પરમાર, અમરાઈવાડીમાંથી મમતા પરમાર, અને વાસણામાંથી અનિતા પાટિલ જ ગુમ થતાં પોલીસે જાણવાજોગ નોંધ કરી છે.

સાબરમતી નદીમાં લાશ મળી
અમદાવાદઃ ચંદ્રભાગા પુલ નીચે સાબરમતી નદીમાંથી એક વૃદ્ધની લાશ મળી આવતાં પોલીસે તપાસ હાથ ધરી છે. ચંદ્રભાગા પુલ નીચે સાબરમતી નદીમાં એક વૃદ્ધની લાશ તરતી હોવાની જાણ થતાં પોલીસે તાત્કાલિક પહોંચી જઇ જરૂરી કાર્યવાહી કરી લાશને બહાર કઢાવી પીએમ માટે મોકલી આપી હતી.

You might also like