કેજરીવાલઃ મુલાકાત ધાર્મિક, મિશન રાજકીય

આમ આદમી પાર્ટી- ‘આપ’ના સુપ્રીમો અને દિલ્હીના મુખ્યપ્રધાન અરવિંદ કેજરીવાલ સૌરાષ્ટ્રની માત્ર રર કલાકની મુલાકાતે આવીને દિલ્હી પરત જતા રહ્યા, પરંતુ તેમની આ મુલાકાતના પડઘા ર૦૧૭ની ગુજરાત વિધાનસભાની આગામી ચૂંટણીઓ સુધી સંભળાતા રહેશે. પરિવાર સાથે દર્શન માટે સોમનાથ પહોંચેલા કેજરીવાલે તેમની આ મુલાકાતને ધાર્મિક ગણાવી, પરંતુ તેમાં રાજકીય રંગ વધુ જોવા મળ્યો છે. કેજરીવાલે આ એક દિવસની મુલાકાતમાં રાજ્યની રાજકીય પરિસ્થિતિનો તાગ મેળવી લઈને વિધાનસભાની આગામી ચૂંટણીઓમાં ‘આપ’ને લડાવવાનો ચોખ્ખો સંકેત આપ્યો છે.

હાલના વડા પ્રધાન નરેન્દ્ર મોદીએ તેમની વિધાનસભાની કારકિર્દીની શરૂઆત જ્યાંથી કરી હતી તેવા રાજકોટ અને ભાજપના ગઢ એવા સૌરાષ્ટ્રને કેજરીવાલે ચાણક્ય નીતિ દ્વારા આગામી વિધાનસભાની ચૂંટણી સંદર્ભે ‘આપ’ માટેનું લોન્ચિંગ પેડ બનાવ્યું છે. તેમણે આ ટૂંકી મુલાકાતથી અનેક નિશાન પાર પાડ્યાં છે. જેથી ભાજપને વિધાનસભાની ચૂંટણીમાં કોંગ્રેસ કરતાં ‘આપ’ની વધુ ચિંતા કરવી પડે તેવી રાજકીય સ્થિતિ ઊભી કરી દીધી છે અને કોંગ્રેસ પણ પોતાનું અસ્તિત્વ બચાવવા દોડતી થઈ ગઈ છે.

મોદી સ્ટાઈલથી વિરોધીઓ પર પ્રહાર
૯મી જુલાઈએ સવારે રાજકોટમાં પગ મૂકતાંની સાથે જ કેજરીવાલે રાજ્યનાં મુખ્યપ્રધાન આનંદીબહેન પટેલને નિશાન બનાવ્યાં હતાં. રાજકોટ એરપોર્ટ પર ઊતર્યા બાદ તેઓ સીધા દર્શનાર્થે સોમનાથ જવા રવાના થયા હતા. શહેરથી આશરે ૧પ કિલોમીટર દૂર પારડી ગામે એક કાર્યકરની વાડીએ તેમના કાફલાએ થોડો વિરામ લીધો હતો, જ્યાં એક સામાન્ય કાર્યકરની જેમ તેમણે ખાટલા પર બેસીને ચાની ચૂસકી લેતાં લેતાં ચર્ચા કરી હતી અને કહ્યું હતું કે, “આનંદીબહેને ભલે સત્તાના જોરે સુરતના વેપારીઓ સાથેની મારી મિટિંગ રદ કરાવી, પરંતુ ભોળાનાથનાં દર્શને આવતાં મને કોઈ રોકી નહીં શકે.”

સોમનાથમાં દર્શન કર્યા બાદ પરત ફરતી વેળા તેમણે સોમનાથ બાયપાસ પર એકત્રિત ખેડૂતોને અસ્સલ મોદી સ્ટાઈલથી સંબોધન કર્યું હતું. તેમણે સભામાં લોકોને સવાલ કરીને “ક્યા હમેં ચુનાવ લડના ચાહીયે?” એમ પૂછ્યું ત્યારે ત્યાં હાજર જનમેદનીએ ‘હા’ માં જવાબ આપી તેમને વધાવી લીધા હતા. રાજકોટથી સોમનાથ સુધી સાથે રહેલા મીડિયાકર્મીઓએ પણ કેજરીવાલનો વન ટુ વન મુલાકાત માટે પ્રયાસ કર્યો હતો, પરંતુ કેજરીવાલે કોઈ ઈન્ટરવ્યૂ આપ્યો ન હતો. વળી સભાસ્થળોએ માત્ર ટૂંકી વાતચીત કરી હતી. રાજકોટ સર્કિટહાઉસ ખાતે રાતના ૧૧ વાગ્યા સુધી પત્રકારોએ તેમને મળવા પ્રયાસ કર્યા, પરંતુ તે ન મળતા તેમનો આ અંદાજ મોદીની યાદ અપાવી ગયો હતો.

આ મુલાકાત પહેલાંથી જાહેર માર્ગો પર કેજરીવાલને આવકારતા હોર્ડિંગ્સ લગાવાયાં હતાં. પ્રચારની આ સ્ટાઈલ પણ ભાજપ જેવી જ હોવાનું ચર્ચાઈ રહ્યું હતું. ‘સાવજ કી ધરા પર ગુજરાતમેં, દિલ્હી કે સાવજ કા સ્વાગત હૈ.’ જેવાં ચોટદાર સ્લૉગન્સ સાથે લગાવાયેલાં આવાં બૅનર્સ આગામી ચૂંટણીની તૈયારીનો સંકેત આપતા હતા. આમ, તેમનો ગુજરાત પ્રવાસ ભાજપ સ્ટાઈલથી પ્રોજેક્ટ કરાયો હતો.

હાલના વડા પ્રધાન નરેન્દ્ર મોદી ગુજરાતના મુખ્યપ્રધાન બન્યા બાદ ર૦૦રમાં રાજકોટ-ર સીટ પરથી વિધાનસભાની ચૂંટણી લડ્યા હતા. જેથી કેજરીવાલે પણ વિધાનસભાની ચૂંટણીનું રણશિંગું ફૂંકવા રાજકોટને પસંદ કર્યું. સોમનાથનાં દર્શન બાદ રાજકોટ આવીને તેમણે બેઠકોનો ધમધમાટ શરૂ કર્યો હતો, જે મોડી રાત સુધી ચાલ્યો હતો.

હિન્દુત્વ પર ભાજપના ઘા
કેજરીવાલે ભાજપના હિન્દુત્વના એજન્ડા પર સવાલો ઉઠાવ્યા હતા. ભૂતકાળમાં ૧૯૯૦માં લાલકૃષ્ણ અડવાણીએ સોમનાથથી અયોધ્યા સુધીની યાત્રા કાઢી હતી, જે ભાજપને સત્તાના સિંહાસન સુધી પહોંચાડવામાં મદદરૂપ બની હતી. વડા પ્રધાન નરેન્દ્ર મોદી પણ સોમનાથ ટ્રસ્ટના ટ્રસ્ટી છે અને અનેક વખતે અહીં દર્શનાર્થે આવી ચૂક્યા છે. આથી જ સોમનાથનાં દર્શન કરીને કેજરીવાલે ભાજપના હિન્દુત્વના શસ્ત્રને બૂઠ્ઠું કરવાનો પ્રયાસ કર્યો છે.

પ્રથમવાર મંદિર દર્શન માટે બંધ રહ્યું
સોમનાથનાં દર્શને વીવીઆઈપી આવતા રહે છે, પરંતુ કેજરીવાલનાં સોમનાથ દર્શન વખતે વીવીઆઈપીના પ્રવેશ માટે અલગ દ્વાર હોવા છતાં ઇતિહાસમાં પ્રથમ વાર મુખ્યદ્વાર બંધ રખાયો હતો. અગાઉ નરેન્દ્ર મોદી કે અન્ય ઝેડ પ્લસ સુરક્ષા ધરાવનારા મહેમાનો આવ્યા ત્યારે પણ આવું બન્યું નથી. જોકે આ અંગે સોમનાથ ટ્રસ્ટના સત્તાધીશોએ સુરક્ષાના કારણે આ નિર્ણય લેવો પડ્યો હોવાનું કહીને બચાવ કર્યો હતો.

‘આપ’ના નિશાને ભાજપનો ગઢ
સૌરાષ્ટ્ર એ ભાજપનો ગઢ રહ્યો છે. પંજાબ, ગોવા અને ગુજરાતમાં આવી રહેલી વિધાનસભાની ચૂંટણીઓ લડવાનું નક્કી કર્યા બાદ કેજરીવાલે પ્રથમ વાર ગુજરાતની મુલાકાત માટે સૌરાષ્ટ્રને પસંદ કર્યું તેની પાછળ અનેક રાજકીય ગણતરીઓ હોવાનું મનાઈ રહ્યું છે. કેજરીવાલની રણનીતિ ભાજપને તેના જ ગઢમાં ઘેરવાની છે. તેમની આ મુલાકાતથી માત્ર ‘આપ’ના કાર્યકરોમાં જ નહીં, આમ આદમીમાં પણ અનેરો ઉત્સાહ જોવા મળ્યો છે. રાજકોટથી સોમનાથની વચ્ચેનાં ગામડાંમાં લોકો રસ્તા પર કતારો લગાવીને તેમને જોવા અને તેમના સ્વાગત માટે હારબંધ ઊભા હતા. કેટલાંક ગામોમાં તો ગામવાસીઓ તેમને જોવા અગાસીઓ પર ચઢી ગયા હતા. આવાં દૃશ્યો વર્ષો અગાઉ આ રસ્તેથી મોદી પસાર થયા હતા ત્યારે જોવા મળ્યાં હતાં.

યાત્રા ધાર્મિક, મિશન રાજકીય
સોમનાથનાં દર્શન કર્યાં બાદ કેજરીવાલે તેમના રાજકીય મિશનની શરૂઆત કરી હતી. સોમનાથ બાયપાસ પર સભાને સંબોધન કરીને રાજ્ય અને કેન્દ્રની ભાજપ સરકાર પર પ્રહારો કર્યા હતા. બાદમાં રાજકોટ આવીને સામાજિક અને રાજકીય લોકો સાથે બેઠકો યોજી હતી, જે મોડી રાત સુધી ચાલી હતી. રાજકોટ સર્કિટ હાઉસમાં ભાજપના બળવાખોર ધારાસભ્ય નલીન કોટડિયા, અમદાવાદના જાણીતા વકીલ યતીન ઓઝા, રાજકોટના કરણાભાઈ માલધારી સહિતના આગેવાનો સાથે બેઠક કરી હતી.

જેમાં યતીન ઓઝા ‘આપ’માં જોડાઈ ગયાની જાહેરાત પણ કરાઈ હતી અને નલીન કોટડિયા ટૂંક સમયમાં ‘આપ’માં જોડાશે તેમ મનાઈ રહ્યું છે. કેજરીવાલે સૌરાષ્ટ્રમાં ‘આપ’ને મજબૂત બનાવવા ભાજપ- કોંગ્રેસથી અલગ થયેલા કેટલાક નેતાઓને સાથે લેવાની વ્યૂહરચના અપનાવી છે. અમરેલી-બાબરા વિસ્તારના એક સમયના ભાજપ આગેવાન એમ.ડી. માંજરિયા હાલ ‘આપ’માં સામેલ થયા છે. કેજરીવાલની આ મુલાકાતમાં તેઓ સક્રિય રહ્યા હતા અને આગામી ચૂંટણીમાં તેઓ વિધાનસભાના ઉમેદવાર હશે તેમ પણ મનાઈ રહ્યું છે.

પાટીદારોને સાથે રાખવાનો વ્યૂહ
એક આંદોલનકારીમાંથી સત્તા સુધી પહોંચનાર ‘આપ’ના રણનીતિકારો ગુજરાતમાં પાટીદાર આંદોલને ભાજપ સરકારને કેટલી ભીંસમાં લીધી છે તે બાબતથી સારી રીતે વાકેફ છે. આથી જ ભાજપને ભીડવવા ‘આપે’ પાટીદારો તરફી ઝુકાવ અપનાવ્યો છે. કેજરીવાલે તેમની મુલાકાત દરમિયાન જ્યાં સભાઓ થઈ ત્યાં હાર્દિક પટેલને જામીન મળ્યા અંગે ખુશી વ્યક્ત કરીને તે અન્ય કેસોમાંથી ઝડપથી છૂટી જાય તેવો આશાવાદ વ્યક્ત કર્યો હતો.

તેમણે તો એમ પણ કહ્યું કે, “ભાજપ વિરુદ્ધ બોલવું એટલે રાષ્ટ્રદ્રોહ કર્યો તેમ માનીને ખોટા કેસ કરાઈ રહ્યાં છે.” આમ, પાટીદારો વિરુદ્ધ થયેલા કેસનો મુદ્દો ઉછાળીને ભાજપ પર પ્રહારો કરીને તેમણે પાટીદારોનાં દિલ જીતવાનો પ્રયાસ કર્યો હતો. કેજરીવાલની સાથે ગુજરાત મુલાકાતે આવેલા ‘આપ’ના નેતા અને પ્રવક્તા કુમાર વિશ્વાસે પણ રાજકોટમાં પત્રકારો સાથે વાત કરી ત્યારે પાટીદાર આંદોલનને યોગ્ય ગણાવ્યું હતું.

રાજકીય મિશન સાથેની કેજરીવાલની ધાર્મિક મુલાકાતથી ભાજપની ચિંતા ઘેરી બની છે. રાજ્યની વર્તમાન સમસ્યાઓ ઉપરાંત પાટીદાર જેવો મોટો વર્ગ ભાજપથી વિમુખ હોય ત્યારે આમ આદમી પાર્ટી સત્તાધીશ પક્ષની મુશ્કેલીઓ વધારી શકે છે. જોકે ચૂંટણી વખતનાં સમીકરણો જુદાં હોય છે. છતાં કેજરીવાલની મુલાકાતથી ભાજપનાં ભયસ્થાનોમાં વધારો થયો હોવાનું ચોક્કસ માની શકાય.

કલસરિયા ‘આપ’નો ચહેરો બનશે!
દિલ્હીમાં ભાજપની તમામ તાકાત સામે લડત આપી સત્તા મેળવનાર આમ આદમી પાર્ટી ગુજરાતમાં આગામી વિધાનસભાની ચૂંટણી લડવા સજ્જ થઈ છે. આથી ભાજપ સામે મોટો પડકાર ઊભો કરવા સ્વચ્છ છબી ધરાવતા કનુભાઈ કલસરિયાને ‘આપ’નો ચહેરો બનાવવાની રણનીતિ ઘડાઈ રહી છે.

ભ્રષ્ટાચાર સામેની લડત એ ‘આપ’નો મુખ્ય એજન્ડા છે અને કલસરિયા ભ્રષ્ટાચાર બાબતે રાજ્યમાં કેટલીક કંપનીઓ સામે લડત આપીને આંદોલન ચલાવી રહ્યા છે. ‘આપ’ પણ તેમને આગળ ધરીને વિધાનસભાની ચૂંટણી લડવા માગે છે. દિલ્હીથી આવેલા ‘આપ’ના કેટલાક નેતાઓએ કહ્યું કે, “ગુજરાતમાં કનુભાઈના જે વિચારો છે તે અમારી પાર્ટીના મુદ્દા રહેશે.” કેજરીવાલ સાથે આગેવાનોની બેઠકો ગોઠવવામાં પણ કનુભાઈ સક્રિય રહ્યા હતા.

દેવેન્દ્ર જાની

You might also like