મુસલમાન હોવાને કારણે મારા પુત્રને ફસાવાયોઃ ખાલિદના પિતા

નવી દિલ્હી: ૯ ફેબ્રુઆરીના રોજ જેએનયુમાં આતંકી અફઝલ ગુુરુની ફાંસીની વરસી નિમિત્તે કાર્યક્રમનું આયોજન કરાવનાર અને દેશદ્રોહી સૂત્રો પોકારવા માટે ઉશ્કેરનાર તેમજ સમગ્ર ઈવેન્ટના માસ્ટર માઈન્ડ ઉમર ખાલિદના પિતાએ જણાવ્યું છે કે તેમનો પુત્ર મુસલમાન હોવાથી તેને ફસાવીને નિશાન બનાવવામાં આવી રહ્યો છે. ઉમર ખાલિદના પિતા સૈયદ કાસિમ ઈલિયાસે પોતાના પુત્ર સામે ચલાવવામાં આવી રહેલી મીડિયા ટ્રાયલ પર નિશાન તાક્યું છે.

એક અખબાર સાથેની વાતચીતમાં સૈયદ કાસિમ ઈલિયાસે જણાવ્યું હતું કે મીડિયા રિપોર્ટમાં મારા પુત્ર ઉમર ખાલિદને આતંકવાદી ગણાવવાના પ્રયાસો અયોગ્ય છે. ઈલિયાસે એવો આક્ષેપ કર્યો છે કે તેમના પુત્ર અને કન્હૈયાને અલગ અલગ રીતે ટ્રીટ કરવામાં આવી રહ્યા છે.

તેમના જણાવ્યા અનુસાર ભાગલા પાડો અને રાજ કરો’ની નીતિ પર સરકાર ચાલી રહી છે. ઈલિયાસે જણાવ્યું છે કે મારો પુત્ર અભ્યાસમાં હોશિયાર છે અને ડાબેરી વિચારધારા ધરાવે છે. તેની વિરુદ્ધ મીડિયા ટ્રાયલ એટલા માટે ચલાવવામાં આવી રહી છે કારણ કે પોલીસને જો એક મુસ્લિમ ચહેરો મળી જાય તેનો કેસ મજબૂત થઈ જશે. ઈલિયાસ એક સામાજિક એક્ટિવિસ્ટ છે અને વેલ્ફેર પાર્ટી ઓફ ઈન્ડિયાનાે નેશનલ પ્રેસિડેન્ટ છે.

ઈલિયાસે જણાવ્યું છે કે હું મારા પુત્રને અપીલ કરું છું કે તે સામે આવીને કાયદાનો સામનો કરે, પરંતુ મને તેની સુરક્ષા અંગે ચિંતા સતાવી રહી છે. જો તેણે દેશદ્રોહી સૂત્રોચ્ચાર કર્યો હોય તો તેણે કાયદાનો સામનો કરવો જોઈએ. એક અહેવાલ અનુસાર ઈલિયાસ પ્રતિબંધિત સંગઠન સીમી સાથે સંકળાયેલા છે. આ અંગે તેમણે જણાવ્યું હતું કે મેં ૧૯૮૫માં સીમી છોડી દીધું હતું અને ત્યારે ખાલિદનો જન્મ પણ થયો ન હતો. મારા બેકગ્રાઉન્ડને કારણે મારા પુત્રને નિશાન બનાવવામાં આવી રહ્યો છે.

You might also like