VIDEO: જન્માષ્ટમીએ રાજકોટ, બહુચરાજી અને રાધનપુરમાં થઇ જૂથ અથડામણ

રાજકોટઃ જન્માષ્ટમીનાં તહેવાર દરમ્યાન જુદા-જુદા શહેરોમાં બે જૂથો વચ્ચે અથડામણનાં બનાવો બન્યા હતા જેમાં રાજકોટના રામનાથપરામાં અગમ્ય કારણોસર બે જૂથ સામ સામે આવી ગયા હતા અને પથ્થરમારો તેમજ વાહનોમાં તોડફોડ કરી હતી. આ બનાવમાં ૧પ વ્યક્તિને ઇજા થઇ હતી. તમામને સારવાર માટે સિવિલ હોસ્પિટલ ખસેડાયા હતાં.

આ બનાવનાં પગલે ઉચ્ચ પોલીસ અધિકારીઓ સહિત મોટો પોલીસ કાફલો ઘટનાસ્થળે પહોંચી ગયો હતો. પોલીસે બનાવ બાદ ચુસ્ત બંદોબસ્ત ગોઠવી પેટ્રોલિંગ શરૂ કર્યું હતું. ૪૦ થી વધુ લોકોની ઘટનાસ્થળેથી અટકાયત કરી લીધી હતી.

મહેસાણાનાં બહુચરાજી ગામમાં બે જૂથ વચ્ચે અથડામણ સર્જાઇ હતી. બે જૂથનાં લોકો તિક્ષ્ણ હથીયાર સાથે સામસામે આવી જઇ મારામારી કરી હતી. જેમાં ત્રણ મહિલા અને ત્રણ પુરુષોને ગંભીર ઇજા થતા સારવાર માટે હોસ્પિટલે ખસેડવામાં આવ્યાં હતાં.

દારૂનાં ધંધાની અદાવતમાં મારમારી થઇ હોવાની પોલીસની પ્રાથમિક તપાસમાં બહાર આવ્યું હતું. પોલીસે આ મામલે હાલ તપાસ શરૂ કરી દીધી છે. આ ઉપરાંત પાટણ જિલ્લાનાં રાધનપુર શહેરમાં અંગત અદાવતમાં બે જૂથો વચ્ચે મારામારીનો બનાવ બન્યો હતો.

આ ઘટનામાં બે વ્યક્તિને ઇજા થતાં પાટણની ધારપુર હોસ્પિટલમાં ખસેડવામાં આવ્યા હતા. આ ઘટનાની પોલીસને કરાતા પોલીસ કાફલો ઘટના સ્થળે પહોંચી ગયો હતો. જે મામલે પોલીસે ગુના દાખલ કરી તપાસ શરૂ કરી દીધી છે. બીજા બનાવમાં પાલનપુર શહેરમાં ગઇ કાલે જન્માષ્ટમીની શોભાયાત્રા દરમ્યાન પોલીસ અને લોકો વચ્ચે ઘર્ષણની સ્થિતિ ઊભી થઇ હતી. શોભાયાત્રા ઝડપની આગળ વધારવા માટે ઘર્ષણ થયું હતું.

You might also like