ઇસ્કોનબ્રિજ પાસે નાની-દોહિત્રીને કારની ટક્કરઃ નાનીનું મોત

અમદાવાદ: શહેરના સરખેજ-ગાંધીનગર હાઇવે પર ઇસ્કોનબ્રિજ નજીક ગત સાંજે રોડ ક્રોસ કરી રહેલાં નાની-દોહિત્રીને એક અજાણ્યા કાર ચાલકે અડફેટે લેતાં ૬૭ વર્ષીય વૃદ્ધાનું મોત નિપજ્યું હતું. જ્યારે કિશોરીને સામાન્ય ઇજા પહોંચતા હોસ્પિટલ ખસેડાઇ હતી. એન ડિવિઝન ટ્રાફિક પોલીસે અજાણ્યા કારચાલક વિરુદ્ધ ગુનો નોંધી આરોપી કાર ચાલકની સીસીટીવી ફૂટેજના આધારે શોધખોળ શરૂ
કરી છે.

પોલીસ સૂત્રોનાં જણાવ્યાં મુજબ જોધપુર ગામમાં પ્રેરણાતીર્થ દેરાસર પાસે આવેલા રોઝવૂડ એસ્ટેટમાં રહેતાં તમિમભાઇ તેલંગે એન ડિવિઝન ટ્રાફિક પોલીસ સ્ટેશનમાં ફરિયાદ નોંધાવી છે કે તેઓનાં સાસુ જેનેથબહેન પ્રભાકર થોમસ (ઉ.વ.૬૭) અને તેઓની પુત્રી પ્રિશા (ઉ.વ.૧પ) ઇસ્કોન મંદિર નજીક આવેલાં ઇસ્કોન મેગા મોલમાં ગયાં હતાં.

સાંજે પાંચેક વાગ્યાના આસપાસ બંને નાની-દોહિત્રી ઇસ્કોન મેગા મોલ સામેથી રોડ ક્રોસ કરી રહ્યાં હતાં. ત્યારે પૂરપાટ ઝડપે એક કાર આવી હતી. કાર ચાલકે નાની-દોહિત્રીને અડફેટે લેતાં જેનેથબહેનને શરીરના ભાગ ગંભીર ઇજાઓ થઇ હતી. જ્યારે પ્રિયાને સામાન્ય ઇજા થવા પામી હતી. બંનેને સારવાર અર્થે હોસ્પિટલ ખસેડાયાં હતાં. જ્યાં જેનેથબહેનનું સારવાર દરમ્યાન મોત નિપજ્યું હતું. અકસ્માત બાદ કારચાલક કાર સાથે નાસી છૂટયો હતો. ઘટનાની જાણ એન ડિવિઝન ટ્રાફિક પોલીસને થતાં પોલીસ તાત્કાલિક ઘટનાસ્થળે દોડી ગઇ હતી. પોલીસે અજાણ્યા કાર ચાલક સામે ગુનો નોંધી તેઓ ઝડપવા તજવીજ હાથ ધરી છે.

ઉલ્લેખનીય છે કે શહેરની અંદર વારંવાર હિટ એન્ડ રનની ઘટનાઓ બનતી હોય છે. સરખેજ-ગાંધીનગર હાઈવે પર પૂરપાટ જતાં વાહનોની અડફેટે લોકોનાં મોતની ઘટના વધી રહી છે પરંતુ કોઈપણ આરોપીને પકડવામાં પોલીસને સફળતા મળતી નથી. સરખેજ-ગાંધીનગર હાઈવે પર પોલીસ દ્વારા સીસીટીવી કેમેરા માત્ર ચાર રસ્તા પર જ લગાવવામાં આવ્યા છે. જેના કારણે વાહનચાલકની ઓળખ પણ જલદી થઈ શકતી નથી. ઉપરાંત ઈસ્કોન મોલ પાસેથી અનેક લોકો રોડ ક્રોસ કરી સામેની તરફ જતા હોય છે. રવિવારના દિવસે વધુ ભીડ હોય છે ત્યારે આવા નાના-મોટા અકસ્માત સર્જાતા રહે છે.

You might also like