પત્નીને આંધળો પ્રેમ કર્યો છે અને મૃત્યુ બાદ પણ કરતો રહીશ

મુંબઇ: મુંબઇના મહાલક્ષ્મીમાં રહેતા એક ગુજરાતી યુવકે લાઇવ વીડિયો ઉતારીને ગળાફાંસો ખાધો છે. મહાલક્ષ્મીના તુલસીવાડીના ટ્ર‌ાન્ઝિટ કેમ્પમાં પત્ની અને બે બાળકો સાથે રહેતા ૩૧ વર્ષીય મયૂર ગોહીલે તેના બિલ્ડિંગ રહેતા બે લોકોએ તેની પત્નીને ગેરમાર્ગે દોરીને જીવવાનું હરામ કરી નાખ્યું હોવાનો આક્ષેપ કરતા ચાર વીડિયો આત્મહત્યા કરતાં પહેલાં ઉતાર્યા હતા.

મયૂરની આત્મહત્યા બાદ તેની માતા શાંતા મારુ રડી રડીને બેહાલ બની ગયાં છે. તેમણે યુવાન દીકરાની હત્યા માટે જવાબદાર લોકોને જેલના સળિયા પાછળ ધકેલવાની માગ કરી છે. પોલીસ પુરાવા એકત્ર કરી રહી છે, પરંતુ હજુ સુધી કોઇની ધરપકડ થઇ નથી.

મયૂરની આત્મહત્યાનો લાઇવ વીડિયો છે. પત્ની સાથે ઝઘડો થયા બાદ ૧૮ એપ્રિલે મયૂરે ઝેેર પીધું અને તેની પત્ની પણ દવા ખાઇ ગઇ. બંનેની સારવાર નાયર હોસ્પિટલમાં કરાવાઇ હતી. ત્યાર બાદ પત્ની તેના પિયર ચાલી ગઇ. મયૂરની માતાનું કહેવું છે કે ત્યાર બાદ હું મારા દીકરાને લઇને તેની પત્નીને પાછી લાવવા તેના પિયરે ગઇ, પરંતુ વાત આગળ ન વધી શકતાં હું મયૂરને લઇને મારા ઘરે નાલાસોપારા આવી. મારી દીકરીને તેણે મોબાઇલમાંથી બે ઓડિયો આપ્યા હતા. જેમાં એકમાં મયૂરની પત્ની તેના પુરુષ મિત્ર સાથે ગોવા ફરવા જવાની તૈયારી કરતી હતી.

શુક્રવારે મયૂર સવારે ૪-૩૦ વાગ્યાની ટ્રેનમાં બોમ્બે સેન્ટ્રલ ઊતરીને તેના ઘરે ગયો. તેણે માતાને સાંત્વના આપી કે તે સાંજ સુધીમાં બધું ઠીક કરી દેશે. સવારે ૯થી ૧૧ વાગ્યા વચ્ચે જે કંઇ બન્યું તેનું તેણે વીડિયો રેકોર્ડિંગ ઉતાર્યું છે. દીકરાની ડેડ બોડી લઇ જતી વખતે પોલીસ બંને મોબાઇલ સાથે લઇ ગઇ.

વીડિયોમાં મયૂરે કહ્યું છે કે બિલ્ડિંગમાં રહેતા બે વ્યકિતઓએ મારું જીવવાનું હરામ કરી દીધું છે. જેથી કંટાળીને હું આ અંતિમ પગલું ભરી રહ્યો છું. મારી પત્ની શરૂઆતમાં મને ખૂબ જ પ્રેમ કરતી હતી અને મારું ખૂબ જ ધ્યાન રાખતી હતી, પરંતુ ધીમે ધીમે વાત વણસતી ગઇ. અમારા બિલ્ડિંગમાં રહેતા બે વ્યકિતએ મારી પત્નીને ગેરમાર્ગે દોરી છે.

તેણે મારી પત્ની સાથે ગોવા જવાની વાત કરતો ઓડિયો પણ મેં સાંભળ્યો હતો. જોકે મેં મારી પત્નીને માફ કરી દીધી છે. કેમકે હું તેને આંધળો પ્રેમ કરું છું અને મને તેના પર વિશ્વાસ છે. જોકે પોલીસને હું એટલું કહેવા માગું છું કે મારી પત્નીને બહેકાવનાર લોકોને છોડતા નહીં.

You might also like