હાર્દિક પટેલે હવે વિપક્ષના નેતા પરેશ ધાનાણી સામે ખોલ્યો મોરચો

અમદાવાદ: વિધાનસભાની ચૂંટણી દરમ્યાન કોંગ્રેસને ખુલ્લું સમર્થન આપનાર તેમજ પરેશ ધાનાણીને વિપક્ષના નેતા બનાવવાની ખુલ્લેઆમ માગણી કરનાર પાસના કન્વીનર હાર્દિક પટેલે આજે પાટીદાર સમાજ સામે થયેલા કથિત અત્યાચારના મુદ્દે પરેશ ધાનાણી સામે મોરચો ખોલતાં રાજકીય વર્તુળોમાં આશ્ચર્ય સર્જાયું છે.

હાર્દિક પટેલે સોશિયલ મીડિયામાં એવું જણાવ્યું હતું કે, છેલ્લા પાંચ દિવસથી ગુજરાત વિધાનસભાનું સત્ર ચાલી રહ્યું છે અને દલિત આત્મવિલોપનનો મુદ્દો વારંવાર ઊઠી રહ્યો છે જે એક સારી બાબત છે અને ઊઠવો પણ જોઇએ, પણ છેલ્લાં અઢી વર્ષથી ચાલતાં પાટીદાર અનામત આંદોલન કે જેમાં શહીદ થયેલા ૧૪ પાટીદાર યુવાન અને નિર્દોષ પર થયેલા ખોટા રાજદ્રોહના કેસનો મુદ્દો કેમ કોઇ કોંગ્રેસના ધારાસભ્ય નથી ઉઠાવતા અને વિપક્ષના નેતા પરેશ ધાનાણી કેમ ચૂપ છે?

પાટીદાર સમાજ પર થયેલા અમાનવીય અત્યાચાર બાબતે કોંગ્રેસ પાર્ટી વિધાનસભામાં ચૂપ રહેવા માગતી હોય તો અમને એમ લાગે છે કે, આવ ભાઇ હરખા, આપણે બંને સરખા જેવું કામ ભાજપ-કોંગ્રેસનું લાગે છે.

હાર્દિકે વધુમાં ઉમેર્યું હતું કે અમને એમ હતું કે પરેશ ધાનાણી જેવા યુવા નેતા વિપક્ષી નેતા બનવાની જનતાને ફાયદો થશે. પરંતુ જનતાના મુદ્દા ન ઊઠવાથી જનતાના વિશ્વાસ પર પાણી ફરી વળ્યું છે. આજે મજબૂત વિપક્ષ હોવા છતાં જો જનતા નિરાશ થાય તો હવે જનતા ક્યાં જશે? દરમ્યાન રાજકીય વર્તુળોમાં હાર્દિક પટેલે પાટીદાર અનામત આંદોલન અંગે પરેશ ધાનાણી સામે સોશિયલ મીડિયામાં વ્યક્ત કરેલી નારજગીએ ચર્ચા જગાવી છે.

You might also like