Movie Review : ‘હેપ્પી ભાગ જાયેગી’ની સિક્વલ છે ‘હેપ્પી ફિર ભાગ જાયેગી’

વર્ષ ૨૦૧૬માં આવેલી ફિલ્મ ‘હેપ્પી ભાગ જાયેગી’ની સિક્વલ છે ‘હેપ્પી ફિર ભાગ જાયેગી’. બંને ફિલ્મોના નિર્માતા આનંદ એલ. રાય, કૃષિકા લુલ્લા અને નિર્દેશક મુદસ્સર અઝીઝ છે. ફિલ્મના કલાકારોમાં થોડા ફેરફાર થયા છે.

અગાઉની ફિલ્મમાં અભિનેતા અભય દેઓલ હતો, જ્યારે આ ફિલ્મમાં પંજાબી ગાયક અને અભિનેતા જસ્સી ગિલ છે અને તેની સાથે અભિનેત્રી સોનાક્ષી સિંહા છે. બાકીના બધા કલાકારો એ જ છે કે જે અગાઉની ફિલ્મમાં હતા. ૧૯૫૮માં આવેલી ફિલ્મ ‘હાવડા બ્રિજ’ના લોકપ્રિય ગીત ‘મેરા નામ ચીન ચીન ચૂ…’ને પણ આ ફિલ્મમાં રિક્રિએટ કરાયું છે.

રોમેન્ટિક-કોમેડી ફિલ્મ ‘હેપ્પી ફિર ભાગ જાયેગી’ની કહાણી છે હરપ્રીત (હેપી કૌર)ની, જે લગ્નના મંડપમાંથી બે વાર ભાગી ચૂકી છે, પરંતુ આ વખતે હેપી ભાગી નથી. ચીનના એક એજન્ટ (બીજો થાંગજામ)એ તેનું અપહરણ કરી લીધું છે. જે હેપી (સોનાક્ષી સિંહા)નું અપહરણ કર્યું છે તે એ હેપી નથી, જેની તલાશ છે.

પંજાબનો ગેંગસ્ટર દમનસિંહ બગ્ગા (જિમી શેર‌િગલ) પણ પોતાના લગ્નના મંડપમાંથી ભાગેલી હેપી (ડાયના પેન્ટી)ને શોધવા આ વખતે ચીન જાય છે.  હેપી (સોનાક્ષી સિંહા) ચીની એજન્ટથી બચવા માટે કોઇ પણ રીતે તેની ચુંગાલમાંથી ભાગી નીકળે છે અને રસ્તામાં તેને ખુશવંતસિંહ (જસ્સી ગિલ) મળી જાય છે.

બંને વચ્ચે પ્રેમ થાય છે. બીજી તરફ દમનસિંહ બગ્ગાને પણ બીજી હેપી સાથે પ્રેમ થાય છે, છતાં પણ તે હેપી (ડાયના પેન્ટી)ને શોધી રહ્યો છે. આ ઉપરાંત ચીની એજન્ટ અને પાકિસ્તાની પોલીસ અધિકારી ઉસ્માન અફ્રિદી પણ હેપીને શોધી રહ્યા છે, પરંતુ એ હેપી ક્યાં છે, જેની બધાંને તલાશ છે. ક્યાંક તે હેપી ગુડ્ડુ (અલી ફઝલ) સાથે તો ફરાર થઇ નથી ને? ક્યાં છે અસલી હેપી? બધાં તેને શા માટે શોધે છે? •

You might also like