GST ડ્રાફ્ટને મહિનામાં અંતિમ સ્વરૂપ અપાશે

નવી દિલ્હી: નાણાં વિભાગના એક ઉચ્ચ અધિકારીના જણાવ્યા પ્રમાણે ગુડ્સ એન્ડ સર્વિસ ટેક્સ કાયદાના ડ્રાફટને એક મહિનામાં અંતિમ સ્વરૂપ આપવામાં આવશે. એસોચેમ દ્વારા આયોજિત એક કાર્યક્રમમાં નાણાં વિભાગના સચિવે કહ્યું કે જીએસટી ડ્રાફટને તૈયાર કરવામાં એક મહિનાનો સમય લાગશે. એક વાર ડ્રાફટ તૈયાર થઈ ગયા બાદ ડ્રાફ્ટને સાર્વજનિક કરવામાં આવશે તથા વેપારી સંગઠનો સાથે આ સંબંધે ચર્ચા-વિચારણા કરવામાં આવશે. તેમણે વધુમાં જણાવ્યું કે જે જીએસટી સંંબંધી દસ્તાવેજ જાહેર કરવામાં આવ્યા છે તે માત્ર પ્રાથમિક દસ્તાવેજો જ છે. ભવિષ્યમાં તેમાં કેટલાય ફેરફાર થઈ શકે છે.

ઉલ્લેખનીય છે કે સરકારની બહુમતીના અભાવે જીએસટી રાજ્યસભામાંથી પસાર થઈ શક્યું નથી. સરકાર જીએસટી બિલ શિયાળુ સત્રમાં પસાર થાય તે માટે જોરદાર પ્રયત્ન કરી રહી છે તો બીજી બાજુ કોંગ્રેસ એક યા બીજાં કારણ આગળ કરી જીએસટી બિલ પસાર ‘ના’ થાય તે માટે રોડાં નાખી રહી છે. ઉલ્લેખનીય છે કે સરકારે આગામી પહેલી એપ્રિલ ૨૦૧૬થી ગુડ્સ એન્ડ સર્વિસ ટેક્સની અમલવારી કરવાની જાહેરાત કરી છે. લોકસભામાં સરકારની બહુમતિ હોવાના કારણે ગુડ્સ એન્ડ સર્વિસ બિલ પસાર થઈ ગયું પરંતુ રાજ્યસભામાં અટવાયું છે.

જીએસટી બિલ જો અમલવારી થાય તો સમગ્ર દેશમાં એકસરખું ટેક્સ માળખું ઊભું થાય તથા જીવન જરૂરિયાતની ચીજવસ્તુઓના ભાવમાં પણ ઘટાડો થાય તેવી શક્યતા નિષ્ણાતો વ્યક્ત કરી રહ્યા છે. એટલું જ નહીં જીએસટીની અમલવારીના કારણે દેશના જીડીપીમાં પણ સુધારો થાય તેવી શક્યતા નિષ્ણાતો વ્યક્ત કરી રહ્યા છે.

You might also like