GST ટેક્સ સ્લેબને ‘મર્જ’ કરવા સરકારની વિચારણા…શું થશે ફાયદો?

નવી દિલ્હી: સરકાર ૧૨ અને ૧૮ ટકાના જીએસટી ટેક્સ સ્લેબને ‘મર્જ’ ખૂબ જ ઝડપથી કરી શકે છે. એટલું જ નહીં ૨૮ ટકા ટેક્સ રેટ માત્ર લક્ઝુરિયસ ચીજવસ્તુઓ અને મોંઘી ચીજવસ્તુઓ માટે જ રાખવામાં આવે તેવી શક્યતા મુખ્ય આર્થિક સલાહકાર અરવિંદ સુબ્રમણ્યમે વ્યક્ત કરી છે, જોકે તેમણે જણાવ્યું છે કે ભારત ક્યારેય સિંગલ જીએસટી રેટની સિસ્ટમને નહીં અપનાવે, પરંતુ સમય જતાં ઝીરો અને પાંચ ટકા જીએસટી ટેક્સ સ્લેબને મર્જ કરીને એક સ્લેબ, એ જ પ્રમાણે ૧૨ ટકા અને અને ૧૮ ટકા જીએસટી ટેક્સ સ્લેબને એક કરીને કોઇ એક ચોક્કસ રેટની અમલવારી આગામી દિવસોમાં થઇ શકે છે, જ્યારે મોંઘી ચીજવસ્તુઓ માટે ૨૮ ટકા જીએસટી સ્લેબ રહેશે. સરકાર આવકના મુખ્ય મુદ્દાને ધ્યાનમાં લઇને ધીમે ધીમે આગળ વધી રહી છે.

અરવિંદ સુબ્રમણ્યમે વધુમાં જણાવ્યું હતું કે હાલ જીએસટી વસૂલાતનો ડેટા ખરાબ નથી. તેમણે કહ્યું કે જીએસટી કાઉન્સિલની છેલ્લી બેઠકમાં એજન્ડામાં જમીન અને રિયલ એસ્ટેટને સામેલ કર્યો હતો, પરંતુ આ મુદ્દે ચર્ચા થઇ શકી ન હતી. આ બંને સેક્ટરને જલદી જીએસટીમાં લાવી શકાય છે.

તેમણે કહ્યું કે જીએસટી કલેક્શનમાં ૧૨થી ૧૩ ટકાનો વધારો થયો છે, જેને પગલે રાજ્યોને પણ આવકમાં ઘટાડો નહીં થાય. ઉલ્લેખનીય છે કે સરકારના જીએસટી અંગેના ટેક્સ સ્લેબ અંગે વેપારીઓમાંથી જ છેલ્લા કેટલાય સમયથી વિરોધ થઇ રહ્યો છે.

કોંગ્રેસે પણ હાલના વિવિધ ટેક્સ સ્લેબ અંગે વિરોધ કર્યો હતો, જેના પગલે છેલ્લી જીએસટી કાઉન્સિલની બેઠકમાં ૧૭૮ ચીજવસ્તુ કે જે ૨૮ ટકાના ટેક્સ સ્લેબમાં સામેલ હતી તેમાં ઘટાડો કરીને ૧૮ ટકાના સ્લેબમાં લાવવામાં આવી છે. એટલું જ નહીં કેટલીક ચીજવસ્તુઓને ૧૮ ટકાના ટેક્સ સ્લેબમાંથી ૧૨ ટકાના ટેક્સ સ્લેબમાં લાવવામાં આવી હતી.

You might also like