GDP ગ્રોથ ૧૦ ટકાને આંબી જશેઃ આર્થિક નિષ્ણાતો

નવી દિલ્હી: ઉત્તર પ્રદેશ અને બીજાં રાજ્યોમાં ભાજપના વિજય બાદ કેન્દ્ર સરકાર આર્થિક સુધારાને વેગ આપશે તો જીડીપી ગ્રોથ ૧૦ ટકા સુધી પહોંચી જશે એવું અગ્રણી અર્થશાસ્ત્રીઓ અને નિષ્ણાતોનું માનવું છે. કોટક મ્યુચ્યુઅલ ફંડના એમડી નિલેશ શાહે એક મુલાકાતમાં જણાવ્યું હતું કે જો ઝડપથી સુધારાની પ્રક્રિયા જારી રહેશે તો દેશનો ગ્રોથ વર્તમાન સાત ટકાથી વધીને ૧૦ ટકા થઇ જશે. અલબત્ત બેન્કોએ તે અગાઉ એનપીએની સમસ્યા ઉકેલવી પડશે.

વૈશ્વિક ક્રેડિટ રેટિંગ એજન્સી મૂડીઝ ઇન્વેસ્ટર્સ સર્વિસે પણ જણાવ્યું છે કે તાજેતરમાં જાહેર થયેલા વિધાનસભા ચૂંટણીનાં પરિણામોના પગલે આર્થિક સુધારા કાર્યક્રમને વેગ મળશે. મૂડીઝે એક નિવેદનમાં જણાવ્યું છે કે તેનાથી ક્રેડિટ પર પોઝિટિવ અસર પડશે.

રેટિંગ એજન્સી મૂડીઝે ૨૦૧૭-૧૮માં રાજકોષીય મજબૂતી યથાવત્ રાખવાના પ્રયાસની પણ પ્રશંસા કરી હતી. શેર માર્કેટમાં પણ સુધારો થશે એવું નિષ્ણાતો જણાવી રહ્યા છે. જીએસટીના અમલ બાદ કંપનીને ચાર ટકાનો ફાયદો થશે, જેના કારણે તેના માર્જિનમાં વધારો થશે અને તેમની કામગીરી સુધરશે.
http://sambhaavnews.com/

You might also like