FIIએ મોઢું ફેરવ્યુંઃ ઈક્વિટી બજારમાં વર્ષ ૨૦૧૬માં ૧૨ હજાર કરોડથી વધુની વેચવાલી

અમદાવાદ: શેરબજારમાં પાછલાં ચાર-છ સપ્તાહથી સતત અનિશ્ચિતતાભર્યા માહોલ વચ્ચે વિદેશી સંસ્થાગત રોકાણકાર ભારતીય ઇક્વિટી બજારમાંથી મોં ફેરવી રહ્યા છે તથા વેચવાલી કરી રહ્યા છે. સેબીના ડેટા મુજબ એફઆઇઆઇએ જાન્યુઆરી મહિનામાં ૧૧ હજાર કરોડથી વધુની ઇક્વિટી બજારમાં વેચવાલી કરી છે, જ્યારે ફેબ્રુઆરી મહિનામાં પણ આ સિલસિલો જારી રહ્યો છે. એફઆઇઆઇએ અત્યાર સુધી ૧.૮ અબજ ડોલર એટલે કે રૂ. ૧૨,૭૭૫ કરોડ રૂપિયાની ઇક્વિટી બજારમાં વેચવાલી કરી છે. એફઆઇઆઇએ વર્ષ ૨૦૦૮ના આ જ સમયગાળામાં એક અંદાજ મુજબ ૧૧,૮૦૫ કરોડ રૂપિયાની વેચવાલી કરી હતી. આમ, વર્ષ ૨૦૦૮ના વૈશ્વિક નાણાકીય સંકટ બાદ એફઆઇઆઇની સૌથી ઝડપી વેચવાલી જોવા મળી હતી.

શેરબજારના જાણકારોના જણાવ્યા પ્રમાણે બજારમાં જોવા મળી રહેલી અનિશ્ચિતતા તથા બજારમાં સુધારો થાય તેવાં સકારાત્મક કોઇ પરિબળ નહીં હોવાના કારણે એફઆઇઆઇ સ્થાનિક બજારમાંથી નાણાં પાછાં ખેંચી રહ્યા છે, જે માર્ચ-૨૦૧૬ સુધી પણ જારી રહી શકે છે. નાણાકીય વર્ષ ૨૦૧૫-૧૬નું જાન્યુઆરીથી માર્ચ મહિનાનું ચોથું ક્વાર્ટર પણ નબળું રહી શકે છે તેવો મત નિષ્ણાતો વ્યક્ત કરી રહ્યા છે.

શેરબજારમાં વધતા જતા જોખમના કારણે વિદેશી રોકાણકાર ઇમર્જિંગ શેરબજારમાંથી નાણાં પાછાં ખેંચી રહ્યા છે. બ્લૂમબર્ગના ડેટા મુજબ ઇન્ડોનેશિયા, ફિલિપાઇન્સ અને તાઇવાન જેવા બજારમાં એફઆઇઆઇની વેચવાલી ૫૦ કરોડ ડોલરથી ઓછી રહી છે.

એફઆઈઆઈની સતત વેચવાલી
૦૨.૦૨.૧૬            – ૬૫.૯૭
૦૩.૦૨.૧૬           – ૩૧૭.૩૩
૦૪.૦૨.૧૬          – ૧૭૭.૫૮
૦૫.૦૨.૧૬          – ૪૬૭.૪૯
૦૮.૦૨.૧૬          – ૩૯.૦૭
(આંકડા કરોડમાં)

You might also like