VIDEO: ખેડૂતોનાં આંદોલનની અસર ગુજરાત સુધી, દૂધ અને શાકભાજી રસ્તા પર ફેંકી સપ્લાય કર્યું બંધ

ગુજરાતઃ સમગ્ર દેશમાં ખેડૂત આંદોલન ચાલી રહ્યું છે. ત્યારે આ આંદોલનની અસર ગુજરાતમાં પણ જોવાં મળી છે. ભાવનગરનાં ખેડૂતોએ પણ આ આંદોલનનો ભોગ બનતા શાકભાજીનું સપ્લાય રોકી દીધું હતું. બાડી પડવા ગામે ખેડૂતોએ શાકભાજી રસ્તા પર ફેંકીને વિરોધ કર્યો હતો. ખેડૂતોએ રસ્તા પર દૂધ ઢોળીને શાકભાજી પશુઓને ખવડાવીને દેશમાં ચાલતાં ખેડૂત આંદોલનને ટેકો આપ્યો હતો.

ઉલ્લેખનીય છે કે આ પહેલાં પણ અગાઉ ભાવનગરનાં બાડી પડવા ગામે GPCL કંપની સામે ખેડૂતોએ ઉગ્ર વિરોધ કર્યો હતો. ખેડૂતો સ્વામીનાથન કમિશનની ભલામણો લાગુ કરવાની માંગ સાથે વિરોધ પ્રદર્શન કરી રહ્યાં છે. 1લી જૂનથી શરૂ થયેલું ખેડૂતોનો આ વિરોધ પ્રદર્શન હજી લગભગ 10 જૂન સુધી ચાલશે. આ દરમ્યાન ખેડૂતોએ અલગ-અલગ રીતે વિરોધ નોંધાવ્યો છે.

ખેડૂતોનાં આ આંદોલનની અસર ગુજરાતમાં પણ જોવાં મળી રહી છે. રવિવારનાં રોજ અમરેલીમાં થયેલા વિરોધ બાદ આજે ભાવનગર સહિત અનેક જગ્યાએ ખેડૂતો ઉગ્ર વિરોધ પ્રદર્શન કરી રહ્યાં છે.

પડવા જમીન સંપાદન મામલે ખેડૂતોનો વિરોધઃ
ભાવનગરનાં બાડી પડવા ખાતે જમીન સંપાદન મામલે ચાલી રહેલાં આંદોલનમાં આજે બાડી ગામ ખાતે ખેડૂતોએ રસ્તા પર શાકભાજી ફેંકીને અને દૂધ ઢોળીને ઉગ્ર વિરોધ નોંધાવ્યો હતો. આ પહેલા પણ ખેડૂતો અનેક વખત વિરોધ નોંધાવી ચૂક્યાં છે પરંતુ ખેડૂતોએ આ વખતે કંઇક અલગ જ પ્રકારે જમીન સંપાદનનો વિરોધ નોંધાવ્યો છે.

ગીર સોમનાથમાં પણ ખેડૂતોએ પોષણક્ષમ ભાવ નહીં મળતાં તેઓએ રસ્તા પર દૂધ ઢોળીને આ મામલે ઉગ્ર વિરોધ નોંધાવ્યો હતો. ફક્ત એટલું જ નહીં ખેડૂતોએ દૂધ અને શાકભાજીનું વેચાણ પણ નહીં કરવાનું નક્કી કર્યું છે.

You might also like