દિલ્હીમાં ટ્રાફિકના નિયમ ભંગ બદલ બે ગણો દંડ વસૂલાશે

નવી દિલ્હી: પાટનગર દિલ્હીમાં વારંવાર થતા ટ્રાફિક નિયમોના ભંગ બદલ હવે ૨૦૦ ટકાથી વધુ દંડની રકમ વસૂલવામાં આવશે. તેમાં ત્રીજી વખત નિયમ ભંગ કરનાર વાહન ચાલકનું લાઈસન્સ પણ જપ્ત કરવામાં આવી શકે છે.

માર્ગ સલામતીને લઈને સુપ્રીમ કોર્ટ દ્વારા રચાયેલી સમિતિના આદેશનો હવે દિલ્હી ટ્રાફિક પોલીસ અમલ કરશે. સમિતિઅે આપેલા આદેશ મુજબ દારૂ પીને વાહન ચલાવનારનું ડ્રાઈવિંગ લાઈસન્સ સસ્પેન્ડ કરી દેવામાં આવશે. તેમજ આ સિવાય અન્ય કેટલાક કડક નિયમો અમલી બનાવવામા આવશે.

દિલ્હી ટ્રાફિક પોલીસના કમિશ્નર મૂકેશ ચંદરે જણાવ્યું કે દિલ્હી પોલીસ ન્યાયાલયની સમિતિના આદેશનો આવતી કાલથી કડક અમલ કરશે. જેમાં વિવિધ નિયમભંગ બદલ જેવા કે ચાલુ વાહને મોબાઈલ પર વાત કરવી, દારૂ પીને ડ્રાઈવિંગ કરવું તેમજ વધુ સામાન લઈને જતાં વાહનોના ચાલકો સામે નિયમ ભંગ બદલ કડક પગલાં લેવામાં આવશે.જેમાં વધુ સ્પીડથી વાહન ચલાવનારને પહેલી વાર ૪૦૦ અને ફરી ૧૦૦૦નો દંડ ફટકારાશે. આ ઉપરાંત જે વિવિધ ગુનામાં દંડ થશે તે આ મુજબ છે.

જેમાં લાલ લાઈટના ભંગ બદલ ૧૦૦ રૂપિયા દંડ હતો તે વધારીને ૩૦૦, મોબાઈલ પર વાત કરવા બદલ ૧૦૦૦ દંડ હતો તે ૨૦૦૦ કરાયો છે. જ્યારે દારૂ પીને વાહન ચલાવવા બદલ બે હજાર દંડ હતો તે વધારીને ૩૦૦૦ અથવા બે વર્ષની જેલ થઈ શકે છે.

આ ઉપરાંત વાહનમાં ક્ષમતાથી વધુ માલ સામાનનું વહન કરવા બદલ ૧૦૦ને બદલે ૩૦૦નો દંડ કરાશે. સીટ બેલ્ટ વગર ડ્રાઈવિંગ કરવા બદલ હવે ૧૦૦ને બદલે ૩૦૦નો દંડ થશે. જ્યારે હેલ્મેટ વગર વાહન ચલાવવા બદલ ૧૦૦ને બદલે હવે ૩૦૦નો દંડ ભરવો પડશે.

You might also like