IAS ઓફીસર બંસલ લાંચકાંડમાં ધરપકડ બાદ પત્ની અને પુત્રીની આત્મહત્યા

નવી દિલ્હી : દિલ્હીનાં મધુવિહારનાં નીલકંઠ એપાર્ટમેન્ટમાં આઇએએસ અધિકારી બી.કે બંસલની પત્ની અને પુત્રીએ આત્મહત્યા કરી લીધી. કોર્પોરેટ અફેર વિભાગનાં ડીજી બંસલને મુંબઇની એક કંપની પાસેથી ફાઇવસ્ટાર હોટલમાં 9 લાખની લાંચ લેતા 16 જુલાઇએ રંગે હાથ પકડાયા હતા. પોલીસનું કહેવું છે કે શરૂઆતી તપાસમાં એવું લાગી રહ્યું છે કે પરિવાર ખુબ જ તણાવમાં હતો. પોલીસને ઘટના સ્થળેથી બંન્નેની સુસાઇડ નોટ પણ મળી આવી છે.

બંસલને 9 લાખ રૂપિયાની લાંચ લેતા રંગે હાથ પકડવામાં આવ્યા હતા. આ કેસમાં 11 લાખ રૂપિયાની લાંચ લેવાનો આરોપ છે. પત્ની અને પુત્રીએ ઘરનાં અલગ અલગ રૂમમાં આત્મહત્યા કરી લીધી હતી. ઘરમાં કામ કરવા આવતી કામવાળીએ જણાવ્યું કે સત્યબાલા મેડમ (પત્ની) અને નેહા (પુત્રી)એ જ્યારે લાંબો સમય સુધી દરવાજો ન ખોલ્યો તો અમે નીચેથી ગાર્ડને બોલાવ્યો હતો. ત્યાર બાદ અમને આ ઘટનાં અંગે જાણવા મળ્યું.

અત્રે ઉલ્લેખનીય છે કે બંસલની ધરપકડ બાદ સીબીઆઇની ટીમ વારંવાર તેનાં ઘરે તપાસ અર્થે જતી રહેતી હતી. મઘુ વિહારનાં નીલકંઠ એપાર્ટમેન્ટમાં તેઓ પરિવાર સાથે રહેતા હતા. જો કે ધરપકડ બાદથી સતત પોલીસની આવન જાવન ઓફીસ અને ઘર પર રહેતું હતું. સંબંધીઓ અને પરિચિતોનાં ઘરે પણ દરોડા પાડવામાં આવી રહ્યા હતા. બંસલ પર 20 લાખની લાંચ લેવાનો કેસ હતો. જેમાં 11 લાખ તે પહેલા જ લઇ ચુક્યા હતા. તેનાં ઘરે શોધખોળ અભિયાન દરમિયાન 56 લાખ રૂપિયા બીજા મળ્યા હતા. વારંવાર પોલીસ અને સીબીઆઇની આવન જાવનનાં કારણે તેનો પરિવાર પરેશાન હતો.

You might also like