CWG 2018: શૂટિંગમાં હિના સિદ્ઘુએ જીત્યો ગોલ્ડ મેડલ

ઑસ્ટ્રેલિયાના ગોલ્ડ કોસ્ટમાં રમાઇ રહેલા 21મા કોમનવેલ્થ ગેમના છઠ્ઠા દિવસે શૂટિંગમાં ભારતે વધુ એક ગોલ્ડ મેડલ જીત્યો છે. 25 મીટર પિસ્ટલ શૂટિંગમાં ભારતની શૂટર હિના સિદ્ઘુએ દેશને ગોલ્ડ મેડલ અપાવ્યો છે. આ સાથે જ ભારતના ગોલ્ડ મેડલની કુલ સંખ્યા 11 થઇ ગઇ છે. હીનાએ ફાઇનલમાં રેકોર્ડ 38 પોઈન્ટ્સ મેળવ્યા હતા. આ ઈવેન્ટમાં ઑસ્ટ્રેલિયાની એલીના ગેલિયાવોવિકને સિલ્વર અને મલેશિયાની આલિયા સજાના અજાહારીને બ્રોન્ઝ મેડલ મળ્યો હતો.

શૂટિંગમાં ત્રણ ગોલ્ડ:
આ પહેલા પણ હીનાએ મહિલાઓની 10 મીટર એર પિસ્તોલ સ્પર્ધામાં સિલ્વર મેડલ જીત્યો હતો. હાલ કોમનવેલ્થ શૂટિંગમાં જ ભારતના ખાતામાં અત્યાર સુધીમાં કુલ ત્રણ ગોલ્ડ મેડલ આવી ચૂક્યા છે. હીના પહેલાં મનુ ભાકેર અને જીતુ રાયે નિશાનેબાજીમાં ગોલ્ડ મેડલ જીત્યો હતો. શુટિંગમાં ભારતને 3 ગોલ્ડ, 2 સિલ્વર, અને 3 બ્રોન્ઝની સાથે કુલ 8 મેડલ પ્રાપ્ત થયા છે.

હોકી: ભારતે મલેશિયાને 2-1થી હરાવ્યું

ભારતીય પુરુષ હોકી ટીમે પુલ-બીના એક અગત્યની મેચમાં મલેશિયાને 2-1થી હરાવ્યું હતું. આ સાથે જ ભારતે સેમીફાઇનલમાં પોતાની જગ્યા પાક્કી કરી લીધી. ભારતની પહેલી મેચ પાકિસ્તાન વિરૂદ્ધ 2-2થી ડ્રૉ થઈ હતી. જ્યારે બીજી મેચમાં ભારતે વેલ્સને 4-3થી હરાવ્યું હતું.

સ્કવોશ: મહિલા ડબલ્સમાં જોશના ચિનપ્પા-દીપિકા પલ્લીકલની જીત

ભારતની જોશના ચિનપ્પા અને દીપિકા પલ્લીકલે સ્કવોશમાં વિમેન્સ ડબલ્સ કેટેગરીમાં પાકિસ્તાનની ફૈજા ઝફર અને મોદિના ઝફરને હરાવી આગળની મેચમાં રમશે. ભારતીય જોડીએ પુલ-સીની પોતાની પહેલી મેચમાં પાકિસ્તાનની જોડીને 2-1થી હરાવી દીધી હતી.

You might also like