શેરબજારમાં સકારાત્મક ચાલ જોવાય તેવી શક્યતા

શેરબજાર ગઇ કાલે છેલ્લે સાધારણ ઘટાડે બંધ જોવા મળ્યું હતું. બીએસઇ સેન્સેક્સ ૧૧.૭૧ પોઇન્ટના ઘટાડે ૩૪,૪૧૫.૫૮, જ્યારે એનએસઇ નિફ્ટી ૧.૨૫ પોઇન્ટના ઘટાડે ૧૦,૫૬૪.૦૫ પોઇન્ટની સપાટીએ બંધ જોવાઇ હતી. સપ્તાહ દરમિયાન શેરબજાર વોલેટાઇલ રહ્યું હતું, જોકે સપ્તાહના અંતે શેરબજારમાં સુધારો નોંધાતો જોવા મળ્યો હતો. સપ્તાહમાં સેન્સેક્સ ૦.૬૫ ટકા, જ્યારે નિફ્ટી ૦.૮૦ ટકાના સુધારે બંધ થયું હતું. જ્યારે બેન્ક નિફ્ટીમાં સપ્તાહના અંતે ૧.૦૨ ટકાનો ઘટાડો નોંધાયો હતો. ગઇ કાલે છેલ્લે બેન્ક નિફ્ટી ૨૪,૯૪૩ પોઇન્ટની સપાટીએ બંધ જોવાઇ હતી.

શેરબજાર નીચલા સ્તરેથી રિકવર થયું છે. ઇન્ફોસિસ અને ટીસીએસના રિઝલ્ટ અપેક્ષા કરતાં સારા આવતાં બજારને સપોર્ટ મળ્યો છે અને તેના કારણે આઇટી ઇન્ડેક્સનું પર્ફોર્મન્સ સારું રહ્યું હતું. સપ્તાહમાં આઇટી ઇન્ડેક્સમાં ૪.૯૦ ટકાનો સુધારો નોંધાતો જોવા મળ્યો છે. ગ્લોબલ માર્કેટમાં નેગેટિવ ન્યૂઝને ભારતી શેરબજારે ડિસ્કાઉન્ટ કર્યો છે. ટ્રેન્ડ જોતાં બજાર ઉપર તેજી કરનારાઓની પકડ છે. આગામી દિવસોમાં શેરબજારમાં પોઝિટિવ ચાલ જોવા મળી શકે છે, જોકે ખાસ કોઇ મોટો સુધારો જોવાની કે ઘટાડો આવવાની શક્યતા ખૂબ જ ઓછી છે.

બુધવારે વિપ્રો અને અલ્ટ્રાટેક સિમેન્ટ, ગુરુવારે એક્સિસ અને યસ બેન્કનાં પરિણામ

વૈશ્વિક બજારમાં ક્રૂડમાં તેજી જોવા મળી રહી છે અને તેના કારણે ક્રૂડની આયાતનું બિલ પણ ઊંચું આવે તેવી શક્યતા છે, જે દેશના આર્થિક વિકાસને પણ અસર કરી શકે છે અને તેના જ પગલે ઓઇલ કંપનીઓના શેર પ્રેશરમાં જોવા મળ્યા છે. એ જ પ્રમાણે સરકાર સામે વિરોધ પક્ષ જે રીતે એક્ટિવ થયા છે તેના કારણે પણ બજારનું સેન્ટિમેન્ટ બગડ્યું છે. આગામી સપ્તાહે એપ્રિલ એક્સપાયરી છે. એક્સપાયરી પૂર્વે બજારમાં બંને તરફની વધ-ઘટ જોવા મળી શકે છે. એ જ પ્રમાણે કેટલીક અગ્રણી કંપનીઓનાં પરિણામ પણ આગામી સપ્તાહે આવશે. બજારની નજર તેના ઉપર રહેશે. નોંધનીય છે કે ૨૬મી એપ્રિલે એક્સપાયરી છે.

શેરબજારના નિષ્ણાતોના જણાવ્યા પ્રમાણે નિફ્ટી ૧૦,૬૨૫ની સપાટી ક્રોસ કરે તો ૧૦,૬૮૦ની સપાટીએ પણ જોવાઇ શકે છે. જ્યારે ૧૦,૪૮૫ મહત્ત્વનું સપોર્ટ લેવલ ગણાવી શકાય. બજારનો ટ્રેન્ડ અપ સાઇડ રહેવાની શક્યતા વધુ છે.

You might also like