પ્રવાસ દરમિયાન રાખો કાળજી

વેેકેશન આડે હવે ગણતરીના દિવસો બાકી છે ત્યારે બાળકોની સાથે તેમનાં માતા-પિતા પણ મે-જૂન મહિનાની આતુરતાથી રાહ જોતાં હોય છે. એનું કારણ છે કે વેકેશન દરમિયાન બાળકોની સાથે સપરિવાર પ્રવાસ કરવાનું આયોજન થઇ શકે છે. દિવાળીનું વેકેશન હોય કે ઉનાળુ વેકેશન જેમનાં બાળકો શાળા-કૉલેજમાં ભણતાં હોય તેવા પરિવારોમાં વેકેશનમાં જ વિવિધ સ્થળોએ ટ્રીપ ગોઠવવાની પ્રાથમિકતા આપવામાં આવે છે. દિવાળીના સમયમાં એક તો તહેવાર હોય અને બીજું ઘણાં બાળકોને ટ્યુશન કે ક્લાસ વગેરે ચાલુ હોય છે તેથી પ્રવાસનું આયોજન કરવા માટે ઉનાળુ વેકેશન શ્રેષ્ઠ સમય માનવામાં આવે છે. આજે આપણે પ્રવાસ દરમિયાન ત્વચા અને વાળની જાળવણી કેવી રીતે કરવી તેના વિશે વાત કરવાના છીએ. જેથી મહિલાઓ પણ ત્વચા અને વાળની ચિંતા એક બાજુએ મૂકી નચિંત થઇને પ્રવાસની મજા માણી શકે.

જ્યારે પણ પ્રવાસ પર જાવ ત્યારે રોજ જે ફેસવૉશ, મોઇશ્ચરાઇઝર, સનસ્ક્રીન વગેરે વાપરતા હોવ તે જ સાથે લઇને જાવ. કોઇ નવી બ્રાન્ડ વાપરવાનો આગ્રહ ન રાખો. હોટેલ દ્વારા જે ટોઇલેટરીઝ આપવામાં આવે છે, તેના બદલે તમે જે રોજ વાપરો છો તે જ પ્રોડક્ટ વાપરો.

પ્રવાસ પર લઇ જવાના કોસ્મેટિક્સની યાદીમાં ક્લિન્ઝિંગ મિલ્કનો અચૂક સમાવેશ કરો. ક્લિન્ઝિંગ મિલ્ક ત્વચા પર જામેલી ધૂળ, રજકણો, મેલ વગેરેને દૂર કરવાનું કામ કરે છે. તેથી ક્લિન્ઝિંગ મિલ્કથી દિવસમાં બે વાર ચહેરો સાફ કરવાનો રાખો.

ક્લિન્ઝિંગ મિલ્કના વપરાશ બાદ તરત જ ચહેરા પર ટૉનર લગાવો. ટૉનર લગાવવાથી ખુલ્લા રહેલા રોમછિદ્રો બંધ થઇ જાય છે અને તેના કારણે બ્લેક હેડ્સની સમસ્યા નથી ઉદ્ભવતી. જોકે,ટૉનર ખરીદતી વખતે સાવચેતી રાખો. આલ્કોહોલવાળા, આર્ટિફિશિયલ કલર કે પરફ્યૂમવાળા ટૉનર ખરીદવાનું ટાળો.

આ ઉપરાંત સનસ્ક્રીન લોશન અને લિપબામ જોડે જ રાખો અને સમયાંતરે ત્વચા પર સનસ્ક્રીન લોશન અને હોઠ પર લિપબામ લગાવતા રહો. બીજી મહત્ત્વની વાત એ કે ટ્રાવેલિંગ દરમિયાન બને ત્યાં સુધી હેવી મેકઅપ કરવાનું ટાળો. આંખોમાં કાજલ અને હોઠ પર લિપસ્ટિક લગાવીને કામ ચાલતું હોય ત્યાં સુધી વધુ પડતો મેકઅપ કરવાનું ટાળો.

સ્વાભાવિક રીતે ટ્રાવેલિંગ દરમિયાન ખાનપાનમાં ધ્યાન રાખવાનું જ હોય, કારણ કે જો તમે ખાવાપીવામાં ધ્યાન નહીં રાખો તો સ્વાસ્થ્ય અને સૌંદર્ય બંને પર અસર થશે અને ફરવાનું એક બાજુ રહી જશે. બસ, આટલી વાતોનું ધ્યાન રાખો અને પ્રવાસ દરમિયાન સૌંદર્યની ચિંતા છોડી મજા કરો.

હેતલ ભટ્ટ

You might also like