IPLફિક્સિંગ મુદ્દે અજીત ચંદેલા પર આજીવન હિકેન શાહ પર 5 વર્ષનો પ્રતિબંધ

મુંબઇ : 2013નાં આઇપીએલ સ્પોટ ફિક્સિંગ મુદ્દે હરિયાણાનાં ઓફ સ્પિનર અજીત ચંદીલા પર બીસીસીઆઇ દ્વારા આજીવન પ્રતિબંધ લગાવી દેવામાં આવ્યો છે. બીસીસીઆઇનાં એક અન્ય આરોપી મુંબઇનાં બેટ્સમેન હિકેન શાહ પર પાંચ વર્ષનો પ્રતિબંધ લગાવી દીધો છે. સોમવારે મુંબઇમાં બીસીસીઆઇની અનુશાસન સમિતીની બેઠક બોલાવવામાં આવી હતી. અધ્યક્ષ શશાંક મનોહરની અધ્યક્ષતાવાળી સમિતીનાં સભ્યોમાં જ્યોતિરાદિત્ય સિંધિયા અને નિરંજન શાહનો પણ સમાવેશ થાય છે. આ મુદ્દે એક અન્ય આરોપી પાકિસ્તાની એમ્પાયર અસદ રઉફને 12 ફેબ્રુઆરીએ સજા ફટકારવામાં આવશે. તેને જવાબ આપવા માટે 9 ફેબ્રુઆરી સુધીનો સમય આપવામાં આવ્યો છે.

ચંદીલા રાજસ્થાન રોયલ્સ માટે રમત દરમિયાન સ્પોટ ફિક્સિંગ મુદ્દે દોષીત જાહેર થયો હતો. તેનાં પર લાંચ લેવી, ફિક્સિંગ, ફિક્સિંગ કરીને ખરાબ પ્રદર્શન કરવું અને સાથી ખેલાડીઓનો સટ્ટેબાજી માટે સંપર્ક કરવાનો આરોપ હતો. બીસીસીઆઇ સચિવ અનુરાગ ઠાકુરે કહ્યું કે તેને બીસીસીઆઇની ભ્રષ્ટાચાર નિરોધક આચાર સંહિતાની કલમ 2.1.1, 2.1.2, 2.1.3, 2.1.4, 2.2.2, 2.2.3, 2.4.1 હેઠળ દોષીત જાહેર કરવામાં આવ્યો છે.

અનુરાગે કહ્યું કે ચંદીલા બોર્ડ અથવા તેનાં સભ્ય એકમો દ્વારા આયોજીત કોઇ પ્રકારની ગતિવિધિઓમાં આજીવન ભાગ નહી લઇ શકે. ઠાકુરે કહ્યું કે બીસીસીઆઇનું લક્ષ્ય ક્રિકેટને પવિત્ર અને સ્વચ્છ રાખવાનું છે. કોઇ પણ પ્રકારનાં ભ્રષ્ટાચાર વિરુદ્ધ કડક હાથે કાર્યવાહી કરવામાં આવશે.

બીજી તરફ બેટ્સમેન શાહ પર સ્થાનિક સર્કિટમાં મુંબઇનાં એક સાથી ખેલાડીને ભ્રષ્ટાચારની ઓફર આપવાનો આરોપ છે. ઠાકુરે કહ્યું કે તેને બીસીસીઆઇની ભ્રષ્ટાચારની આચાર સંહિતા 2.1.1, 2.1.2, 2.1.4 હેઠળ દોષીત જાહેર કરવામાં આવ્યો છે. તે પાંચ વર્ષ સુધી ક્રિકેટનાં કોઇ પણ ફોર્મેટ કે બોર્ડની ગતિવિધિમાં ભાગ નહી લઇ શકે.

You might also like