કાંગારુંઓનો ઇનિંગ્સ અને ૮૦ રનથી કારમો પરાજય

હોબાર્ટઃ આજે મેચના ચોથા દિવસે પ્રવાસી દક્ષિણ આફ્રિકાએ ત્રણ ટેસ્ટ મેચની શ્રેણીની બીજી ટેસ્ટમાં ઓસ્ટ્રેલિયાને એક ઇનિંગ્સ અને ૮૦ રને કારમો પરાજય આપીને શ્રેણીમાં ૨-૦ની સરસાઈ હાંસલ કરી લીધી છે. ઓસ્ટ્રેલિયાની ટીમ પહેલા દાવમાં ફક્ત ૮૫ રન બનાવીને ઓલઆઉટ થઈ ગઈ હતી, જેના જવાબમાં દક્ષિણ આફ્રિકાએ ડિ’કોકની સદીની મદદથી ૩૨૬ રન બનાવ્યા હતા અને ૨૪૧ રનની સરસાઈ હાંસલ કરી હતી. જેની સામે ઓસ્ટ્રેલિયાનો બીજો દાવ એબોટ (છ વિકેટ) અને રબાડા (ચાર વિકેટ)ની કાતિલ બોલિંગ સામે ફક્ત ૧૬૧ રનમાં જ સમેટાઈ ગયો હતો. પહેલી ઇનિંગ્સમાં ત્રણ અને બીજી ઇનિંગ્સમાં છ વિકેટ ઝડપનાર એબોટને મેન ઓફ ધ મેચ જાહેર કરવામાં આવ્યા હતો.

ગઈ કાલે ત્રીજા દિવસની રમત પૂરી થઈ ત્યારે ઓસ્ટ્રેલિયાએ બીજા દાવમાં બે વિકેટે ૧૨૧ રન બનાવ્યા હતા. ખ્વાજા ૫૬ રને અને ઓસ્ટ્રેલિયન કેપ્ટન સ્ટીવ સ્મિથ ૧૮ રન બનાવીને અણનમ રહ્યા હતા. આજે ચોથા દિવસે ટીમના સ્કોરમાં સ્કોરમાં ફક્ત આઠ રનનો જ ઉમેરો થયો હતો ત્યારે એબોટ ત્રાટક્યો હતો અને તેણે ૬૪ રને બેટિંગ કરી રહેલા ખ્વાજાને વિકેટકીપર ડિ’કોકના હાથમાં ઝિલાવી દીધો હતો. ૧૩૫ રનના કુલ સ્કોર પર વોજીસ પણ ફક્ત બે રન બનાવી એબોટની બોલિંગમાં ડુમિની દ્વારા કેચઆઉટ થયો હતો.

ત્યાર બાદ જાણે કે ઓસ્ટ્રેલિયન ખેલાડીઓએ એબોટ અને રબાડાની બોલિંગ સામે ‘તું જા, હું આવું છું’નું રમત ચાલુ કરી હતી અને આખી ટીમ ૬૦.૧ ઓવરમાં ફક્ત ૧૬૧ રન બનાવીને ઓલઆઉટ થઈ જતાં કાંગારુંઓને એક ઇનિંગ્સ અને ૮૦ રને કારમો પરાજય થયો હતો. પર્થ ખાતે રમાયેલી પ્રથમ ટેસ્ટ પણ દક્ષિણ આફ્રિકાએ જ જીતી હતી. આમ, ત્રણ ટેસ્ટ મેચની શ્રેણી દક્ષિણ આફ્રિકાએ પોતાના નામે કરી લીધી છે. શ્રેણીની અંતિમ ટેસ્ટ આવતા અઠવાડિયે એડિલેડ ખાતે ડે-નાઇટ રમાનાર છે.

ઓસ્ટ્રેલિયા પ્રથમ દાવઃ ૮૫
દ. આફ્રિકા પ્રથમ દાવઃ ૩૨૬
ઓસ્ટ્રેલિયા બીજો દાવઃ
બર્ન્સ કો. ડિ’કોક બો એબોટ ૦૦
વોર્નર બો એબોટ ૪૫
ખ્વાજા કો. ડિ’કોક બો એબોટ ૬૪
સ્મિથ કો. ડિ’કોક બો. રબાડા ૩૧
વોજીસ કો. ડુમિની બો એબોટ ૦૨
ફર્ગ્યુસન કો. એલ્ગર બો. રબાડા ૦૧
નેવીલ કો. ડુમિની બો. રબાડા ૦૬
મેનૈ એલબી બો. રબાડા ૦૦
સ્ટાર્ક કો. ડિ’કોક બો એબોટ ૦૦
હેઝલવૂડ અણનમ ૦૬
લિયોન કો. ફિલાન્ડર બો એબોટ ૦૪
વધારાના ૦૨
કુલ ઓલઆઉટ ૧૬૧

You might also like