આ તે કેવો બદલો?: કાકીએ એક વર્ષના ભત્રીજાને ટાંકીમાં ડુબાડ્યો

અમદાવાદ: માણસની અંધશ્રદ્ધા અને બદલાની ભાવના જ્યારે ચરમસીમાએ પહોંચે છે ત્યારે માણસ કોઇ પણ હદ પાર કરી જવા તૈયાર થતો હોય છે. આવી જ અંધશ્રદ્ધા અને બદલાની ભાવનાનો ભોગ નાનું એક વર્ષનું બાળક બન્યું છે.

શહેરના છેવાડે આવેલા લાંભા નજીકના લક્ષ્મીપુરા ગામના નટવરનગરમાં રહેતી સગી કાકીએ પોતાના એક વર્ષના ભત્રીજાને ધાબા પર આવેલી પાણીની ટાંકીમાં ફેંકી દઇ તેની કારમી હત્યા કરી નાખી હોવાનો કિસ્સો પ્રકાશમાં આવ્યો છે.

દશામાના વ્રત દરમ્યાન ઘરમાં અપવિત્ર વસ્તુઓ લાવી હેરાન કરતાં હોવાથી બદલો લેવાની ભાવના સાથે તેણે ઘરના સૌ સભ્યના લાડકા એવા એક વર્ષના બાળકની હત્યા કરી નાખી હોવાની કબૂલાત કરી હતી. અસલાલી પોલીસે આ અંગે ગુનો નોંધી મહિલાની ધરપકડનાં ચક્રો ગતિમાન કર્યાં છે.

મળતી માહિતી મુજબ લાંભા નજીકના લક્ષ્મીપુરા ગામના નટવરનગરમાં રેખાબહેન ધર્મેન્દ્રસિંહ વાઘેલા (ઉં.વ.૩૪) તેમના પતિ, મોટી દીકરી સંજના, નાની ‌દીકરી કાવ્યા તેમજ એક વર્ષના દીકરા દિવ્યરાજ સાથે રહે છે. તેમની સાથે તેમના દિયર મનોજભાઇ, તેમની પત્ની ભાવના અને સાસુ-સસરા પણ રહે છે.

ગઇ તા.ર૦ ઓગસ્ટના રોજ દક્ષ (દિવ્યરાજ) સવારે ૧૧-૩૦ના સુમારે ઘરમાંથી ગુમ થતાં તેની આસપાસ અને ઘરમાં શોધખોળ હાથ ધરી હતી. ઘરની છત પર આવેલી પાણીની ટાંકીમાં તપાસ કરતાં દક્ષની લાશ મળી આવી હતી. તેને એલ.જી. હોસ્પિટલે લઇ જતાં ડોકટરે મૃત જાહેર કર્યો હતો.

આ મામલે અસલાલી પોલીસને જાણ કરાતાં પોલીસ ઘટનાસ્થળે પહોંચી ગઇ હતી. પોલીસે દક્ષના મોતના મામલે અકસ્માતે મોતની ફરિયાદ નોંધી હતી. દક્ષના મૃત્યુ બાદ તેનું મોત પાણીની ટાંકી પડી જવાથી કઇ રીતે થયું હશે તેની સતત ચર્ચા પરિવારજનોમાં ચાલી હતી.

બનાવના દિવસે એટલે કે ર૦ ઓગસ્ટના રોજ સવારે ઘરમાં દક્ષની માતા રેખાબહેન, તેની કાકી ભાવનાબહેન અને દાદા શંકરસિંહ હાજર હતાં. ભાવનાબહેનનો પુત્ર અને રેખાબહેનનો પુત્ર દક્ષ અલગ અલગ રૂમમાં ઘોડિયામાં સૂતા હતા. દાદા શંકરસિંહ ઓસરીમાં સૂતા હતા. રેખાબહેન ઘર પાછળના રસોડામાં જમવા બેઠાં હતાં જ્યારે ભાવનાબહેન કપડાં સૂકવવા ઘરની ધાબા પર ગયાં હતાં.

ભાવનાબહેને રસોડામાં આવીને જાણ કરી હતી કે દક્ષ ઘોડિયામાં નથી અને ઘરમાં પણ નથી જણાતો, જેથી તેની શોધખોળ હાથ ધરી હતી. બનાવના સમયે ભાવનાબહેન કપડાં સૂકવવા ધાબા પર ગયાં હતાં અને ત્યારે જ દક્ષની લાશ ધાબા પર આવેલી પાણીની ટાંકીમાંથી મળી આવી હતી.

ભાવનાબહેન ઉપર પરિવારજનોને શંકા જતાં તેઓની કડક રીતે પૂછપરછ કરી હતી. પૂછપરછમાં જ્યારે ભાવનાબહેને તેમને હકીકત જણાવી ત્યારે ચોંકાવનારી અને પરિવારજનોના પગ નીચેથી ધરતી ખસી જાય તેવી વાત સામે આવી હતી.

ભાવનાબહેને ગુસ્સા સાથે ‌પરિવારજનો સમક્ષ કબૂલાત કરીને જણાવ્યું હતું કે દશામાના વ્રત વખતે તમે બધાંએ મને બહુ હેરાન કરી છે. મેં ના પાડવા છતાં ઘરમાં ન લાવવાની અપવિત્ર વસ્તુઓ લાવતાં હતાં. મારા પુત્ર વિવાનને પણ તમે સારી રીતે રાખતાં ન હતાં, જેથી મેં નક્કી કર્યું હતું કે ઘરના તમામ સભ્યને દશામાના વ્રત વખતે જ ધ્રુસ્કે ધ્રુસ્કે રડાવીશ.

ઘરમાં દક્ષ સૌનો વહાલો હતો, જેથી રેખાબહેન ઘરમાં જમતાં હતાં. તેના દાદા શંકરસિંહ ઓસરીમાં સૂતા હતા ત્યારે દક્ષને ઊંઘમાં જ ઘોડિયામાંથી લઇ ધાબા પર લઇ જઇ તેને પાણીની ટાંકીમાં નાખી ડુબાડી હત્યા કરી દીધી હતી.

વ્રત દરમ્યાન અપવિત્ર વસ્તુઓ ઘરમાં લાવવા જેવી બાબત અને ઘરમાં બીજા પુત્રને સારું ન રાખતાં હોવાને લઇ બદલાની ભાવનાથી એક માતા હોવા છતાં તેના એક વર્ષના ભત્રીજા એવા માસૂમ દક્ષની પાણીમાં ડુબાડી હત્યા કરી નાખી હતી. અસલાલી પોલીસે આ મામલે ભાવનાબહેન વિરુદ્ધ હત્યાનો ગુનો નોંધી ધરપકડ કરવાની તજવીજ હાથ ધરી છે.

You might also like