ભાજપ ચૂંટણી પ્રભારી અરૂણ જેટલી બે દિવસીય ગુજરાત પ્રવાસે, ચૂંટણીઢંઢેરાના આપશે આખરી ઓપ

ભાજપના ચૂંટણીપ્રભારી અરૂણ જેટલી આજથી બે દિવસીય ગુજરાતના પ્રવાસે આવી રહ્યાં છે. અરૂણ જેટલી આજે રાજકોટ ખાતે જશે. અરૂણ જેટલી મુખ્યપ્રધાન વિજય રૂપાણીના ઉમેદવારી ફોર્મ ભરવાની પ્રક્રિયામાં હાજર રહેશે. મુખ્યપ્રધાન વિજય રૂપાણીના ઉમેદવારી ફોર્મ ભરવાની પ્રક્રિયા બાદ અરૂણ જેટલી અમદાવાદ આવી પહોંચશે.

ત્યારે બાદ અમદાવાદ ભાજપ કાર્યાલય ખાતે અન્ય ત્રણ બેઠક કરશે. જેમાં ઘોષણાપત્ર, પ્રચાર-પ્રસાર અને પ્રબુધ્ધ નાગરિકો સાથે બેઠકનું આયોજન કરવામાં આવ્યું છે.

અરૂણ જેટલી ભાજપના ચૂંટણીઢંઢેરાને આખરી ઓપ આપશે. ઉલ્લેખનીય છે કે ભાજપના રાષ્ટ્રીય અધ્યક્ષ અમિત શાહ છેલ્લા ઘણા સમયથી વિધાનસભાની ચૂંટણીને લઇને ગુજરાતમાં છે. તો બીજી તરફ ગુજરાતની જાહેર થયેલી યાદીને લઇને આંતરવિગ્રહ ચાલી રહ્યો છે ત્યારે અરૂણ જેટલીની મુલાકાત જોવાની રહેશે.

શું વિધાનસભાની બેઠકોને લઇને આક્રોશ કરી રહેલા નેતાઓ ગુજરાત ચૂંટણી પ્રભારી અરૂણ જેટલીને મળશે કે નહીં તે અંગે હાલ ચર્ચાએ જોર પકડયું છે.

You might also like