અર્જુનને ‘મિસ્ટર ઈન્ડિયા’ બનવું છે

બોલિવૂડ અભિનેતા અર્જુન કપૂરે તેના કાકા અનિલ કપૂરની સુપરહિટ ફિલ્મ ‘મિ. ઇન્ડિયા’ની સિક્વલમાં કામ કરવાની ઇચ્છા વ્યક્ત કરી છે. અર્જુન કહે છે કે હું ભવિષ્યમાં ક્યારેક ‘મિ. ઇન્ડિયા’ની સિક્વલમાં જરૂર કામ કરીશ. આટલી બેસ્ટ ફિલ્મનો હિસ્સો બનવામાંથી હું ઇન્કાર ન કરી શકું. ‘મિ. ઇન્ડિયા’ જેવી ફિલ્મની સિક્વલ કરવી બહુ મોટી જવાબદારી હોય છે. તે એક સુંદર અને કલાત્મક ફિલ્મ હતી. તે ફિલ્મે આપણા બધા પર એવી છાપ છોડી હતી કે આજે પણ કોઇ બાળકને ‘મિ. ઇન્ડિયા’ બતાવી દઇએ તો તેને ભારતની બેસ્ટ ચિલ્ડ્રન ફિલ્મ લાગશે. તે સમય પ્રમાણે ફિલ્મમાં ખૂબ જ સુંદર વીએફએક્સનું કામ કરવામાં આવ્યું હતું.

અર્જુન કહે છે કે જ્યારે તમે કોઇ પરફેક્ટ વસ્તુને અડો ત્યારે ખૂબ જ સિફતપૂર્વક અડવું જોઇએ. તમારા સ્વાર્થ માટે કોઇ એવી વસ્તુને ટચ ન કરવી જોઇએ. તમે એમ વિચારો કે ચાલો એક ફિલ્મ બનાવી જ દઇએ તો બધું બરબાદ થઇ જાય છે. અર્જુને સાથે એમ પણ કહ્યું કે ‘મિ. ઇન્ડિયા’માં હીરોને માત્ર અડધી જ ફિલ્મનું શૂટિંગ કરવું પડશે, કેમ કે અડધી ફિલ્મમાં હીરો દેખાતો પણ નથી. તે કહે છે કે ‘મિ. ઇન્ડિયા’ની સિક્વલમાં હું ત્યારે જ કામ કરીશ, જ્યારે બધાના આશીર્વાદ મારી સાથે હશે અને એક યોગ્ય ડિરેક્ટરને લઇને ફિલ્મ બનાવવામાં આવશે. ‘મિ. ઇન્ડિયા’ ફિલ્મ અર્જુનના પિતા બોની કપૂરે પ્રોડ્યૂસ કરી હતી. છેલ્લાં કેટલાંય વર્ષોથી આ ફિલ્મની સિક્વલ બનાવવાની ચર્ચા ખૂબ જ સાંભળવા મળે છે. •

You might also like