મ્યુનિસિપલ કોર્પોરેશનનું બજેટ એટલે ફૂલગુલાબી આંકડાઓની માયાજાળ

અમદાવાદ: મેગા સિટી અમદાવાદના શાસક ભાજપ પક્ષ દ્વારા આગામી નાણાકીય વર્ષ ર૦૧૭-૧૮નું રૂ.૬પપ૧ કરોડનું જંબો બજેટ તૈયાર કરાયું છે. દર નાણાકીય વર્ષે આ બજેટનું કદ વધતું જાય છે. શાસકો દ્વારા નાગરિકોને અનેક પ્રકારના સપનાં બતાડવામાં આવે છે, પરંતુ કોર્પોરેશનનું બજેટ ફૂલગુલાબી આંકડાઓની માયાજાળ જ જે તે નાણાકીય વર્ષના અંતે પુરવાર થઇ રહ્યું છે.

આગામી તા.૧પ અને ૧૬ ફેબ્રુઆરીએ મ્યુનિસિપલ મુખ્યાલયના ગાંધી હોલમાં બે દિવસીય બજેટસત્રનો પ્રારંભ થશે. અગાઉના બજેટસત્રમાં શાસક અને વિપક્ષના કોર્પોરેટરો અભ્યાસ કરીને ચર્ચામાં ભાગ લેતા હતા. પહેલાં બજેટસત્ર લાંબું ચાલતું હતું અને નાગરિકો ગૌરવ લઇ શકે તેવી દલીલો થતી હતી, પરંતુ છેલ્લા કેટલાક વર્ષથી બજેટસત્રની ગરિમા જળવાતી નથી.

શાસકોના બજેટ પણ વાસ્તવિક બનતા નથી. દર વર્ષે સત્તાધીશો મોટા મોટા આંકડા રજૂ કરીને નાગરિકો સમક્ષ વિકાસના બણગા ફુંકે છે, પરંતુ આભાસી બજેટના કારણે બજેટના અનેક ઠરાવ ફકત ‘કાગળ’ પર રહી જાય છે. મ્યુનિસિપલ કોંગ્રેસના નેતા દિનેશ શર્માએ એવો આક્ષેપ કર્યો છે કે શાસક પક્ષ દ્વારા બજેટની કુલ ૩૦ ટકા રકમ માત્ર ‘કાગળ’ રહી જાય છે. ખરેખર બજેટ ખોટા વચનો કે ભરમાવનારા વિધાનો કરનારું નહીં, પરંતુ તેનો સમગ્ર નાણાકીય વર્ષ દરમિયાન જવાબદારીપૂર્વક અમલ કરાવવા માટેની વચનબદ્ધતા છે. કમનસીબે શહેરને સ્વચ્છ અને સુંદર બનાવવાના સપનાં પણ શાસકોના નકલી બજેટના કારણે રોળાઇ રહ્યા છે.

amc-1

You might also like