અમદાવાદ શહેરના ૧.૨૫ લાખ વિદ્યાર્થીઓ ૨૧ જૂને કરશે યોગ

અમદાવાદ: ૨૧ જૂને વિશ્વ યોગ દિવસની ઉજવણીમાં વર્લ્ડ રેકોર્ડ કરવા માટે સરકારે તડામાર તૈયારીઓ આરંભી દીધી છે. યોગ દિવસે સરકારી માધ્યમિક શાળાના ૭૫ હજાર અને પ્રાથમિક શાળાના ૫૦ હજાર જેટલા વિદ્યાર્થીઓ પણ જોડાશે. યોગગુરુ બાબા રામદેવના નેતૃત્વ હેઠળ સમગ્ર કાર્યક્રમની ઉજવણી થશે. જીએમડીસી ગ્રાઉન્ડ સહિત આસપાસના ૫ ગ્રાઉન્ડમાં લાખો લોકો અને વિદ્યાર્થીઓ યોગ કરશે. તેમને લાવવા-લઈ જવા માટે સરકાર બસ સુવિધા પૂરી પાડશે.

ગત વર્ષે રાજ્યભરમાં વિવિધ જગ્યાએ યોગનું આયોજન થયું હતું, તેમાં ૧.૨૦ કરોડ જેટલા લોકો યોગની ઈવેન્ટમાં જોડાયા હતા. આ વર્ષે આ આંક વધારીને ૧.૩૧ કરોડ કરવાનો પ્રયત્ન હાથ ધરાયો છે. ગત વર્ષે ૮,૫૦૦ બાળકોએ જીએમડીસી ગ્રાઉન્ડમાં યોગ કર્યા હતા, જેથી આ વર્ષે અમદાવાદ સહિત રાજ્યભરની સરકારી અને ગ્રાન્ટેડ શાળાનાં બાળકોને પણ યોગ દિવસે યોગ કરાવીને અનોખો રેકોર્ડ કરવામાં આવશે. સરકારના માર્ગદર્શન હેઠળ યોગ દિવસની ઉજવણી કરવાની હોઈ ગઈ કાલે કલેક્ટરના અધ્યક્ષસ્થાને એક બેઠક યોજવામાં આવી હતી.

અમદાવાદ સહિત રાજ્યભરના તમામ જિલ્લામાં ૭ જૂનથી ૧૩ જૂન સુધી ‘બાયસેગ’ દ્વારા યોગ ટ્રેનરને તાલીમ આપવામાં આવશે તેમજ ૧૪ જૂનથી ૨૦ જૂન દરમિયાન પસંદ કરવામાં આવેલાં સ્થળોએ સવારે ૭ કલાકે પ્રેક્ટિસ અને ટ્રેનિંગ આપવામાં આવશે. અમદાવાદ મ્યુનિસિપલ કોર્પોરેશનના તમામ વોર્ડમાં પણ યોગ દિવસની ઉજવણી કરાશે.
૨૧ જૂને દરેક શાળાએ યોગ દિવસની ઉજવણી સવારે ૭થી ૮ દરમિયાન થાય છે તેના બદલે હવે આ વિદ્યાર્થીઓ એક સમૂહમાં યોગ કરી ગિનિસ બુકમાં વર્લ્ડ રેકોર્ડ સ્થાપિત કરવાની તૈયારી કરશે.

યોગનાે વર્લ્ડ રેકોર્ડ બનાવવા માટે યોગમાં ભાગ લેનારા ગ્રામજનો-નાગરિકોને બસની સુવિધા આપવામાં આવશે. અમદાવાદ ખાતે જીએમડીસી ગ્રાઉન્ડ, એઈએસ ગ્રાઉન્ડ, યુનિવર્સિટી ગ્રાઉન્ડ, સરદાર પટેલ સ્ટેડિયમ, જીએમડીસી સામેનું ગ્રાઉન્ડ સહિતનાં પાંચથી વધુ નજીક નજીક આવેલાં ગ્રાઉન્ડમાં યોગ દિવસની ઉજવણીની તૈયારી શરૂ કરાઈ છે. મુખ્યપ્રધાન વિજય રૂપાણી અને ભાજપ પ્રદેશ પ્રમુખ જીતુ વાઘાણી જીએમડીસી ગ્રાઉન્ડ ખાતે ૨૧ જૂને સવારે ૭ કલાકે યોગ કરશે.
http://sambhaavnews.com/

You might also like