PNB કૌભાંડ બાદ હવે OBCમાં રૂ. ૩૯૦ કરોડનો ગોટાળોઃ CBI દ્વારા કેસ દાખલ

નવી દિલ્હી: પંજાબ નેશનલ બેન્ક (પીએનબી)ના રૂ. ૧૧,૩૦૦ કરોડના કૌભાંડનો પર્દાફાશ થયા બાદ હવે ઓરિયન્ટલ બેન્ક ઓફ કોમર્સ (ઓબીસી)માં રૂ. ૩૯૦ કરોડનું કૌભાંડ બહાર આવ્યું છે. સીબીઆઈએ ઓરિયન્ટલ બેન્ક ઓફ કોમર્સની ફરિયાદ પર રૂ. ૩૯૦ કરોડના કૌભાંડમાં દિલ્હી સ્થિત એક જ્વેલરી આઉટલેટ વિરુદ્ધ કેસ દાખલ કર્યો છે.

સીબીઆઈએ કરોલબાગ સ્થિત દ્વારકાદાસ શેઠ ઈન્ટરનેશનલ પ્રાઈવેટ લિમિટેડ વિરુદ્ધ કેસ દાખલ કર્યો છે. આ કંપની ડાયમન્ડ, ગોલ્ડ અને સિલ્વર જ્વેલરીના મેન્યુફેક્ચરિંગ અને ટ્રેડિંગનું કામ કરતી હતી.

આ કંપનીએ ૨૦૦૭થી ૨૦૧૨ દરમિયાન ઓરિયન્ટલ બેન્ક ઓફ કોમર્સની ગ્રેટર કૈલાસ-૨ સ્થિત બ્રાંચમાંથી ફોરેન લેટર ઓફ ક્રેડિટ મેળવીને કેટલાય પ્રકારની લોન લીધી હતી. આ કંપનીનું સંચાલન સભ્ય શેઠ અને રીતા શેઠના હાથમાં છે, જેઓ પંજાબીબાગમાં રહે છે.

આ ઉપરાંત કૃષ્ણકુમાર સિંહ અને રવિકુમાર સિંહ પણ આ કંપની સાથે જોડાયેલા છે, જેઓ સરાઈકાલે ખાનના નિવાસી છે. આ ઉપરાંત એક અન્ય કંપની દ્વારકાદાસ શેઠ એસઈઝેડ ઈન કોર્પોરેશનનું નામ છે. બેન્કે પોતાની તપાસ બાદ એવો દાવો કર્યો હતો કે સભ્ય શેઠ અને કંપનીના અન્ય ડાયરેક્ટર છેલ્લા ૧૦ મહિનાથી તેમના ઘર પર ઉપલબ્ધ નથી. બેન્કે પોતાની તપાસમાં એવી શંકા વ્યક્ત કરી છે કે સભ્ય શેઠ પણ નીરવ મોદી અને વિજય માલ્યાની જેમ ભારત છોડીને ભાગી ગયા છે.

બેન્ક દ્વારા હાથ ધરવામાં આવેલ તપાસમાં એવું જાણવા મળ્યું છે કે કંપનીએ લેટર ઓફ ક્રેડિટનો ઉપયોગ સોનું અને બીજાં કીમતી રત્ન ખરીદવાના પેમેન્ટ કરવામાં કર્યો હતો. કંપનીએ જાલી વ્યવહારોનો ઉપયોગ કરીને સોનું અને નાણાં દેશની બહાર મોકલી દીધાં છે.

બેન્કની ફરિયાદને સીબીઆઈની એફઆઈઆરનો ભાગ બનાવવામાં આવી છે. સરકારી બેન્ક ઓરિયન્ટલ બેન્ક ઓફ કોમર્સે ૧૬ ઓગસ્ટ, ૨૦૧૭ના રોજ સીબીઆઈ સમક્ષ દ્વારકાદાસ શેઠ ઈન્ટરનેશનલ વિરુદ્ધ ફરિયાદ કરી હતી. બેન્કનો દાવો છે કે દ્વારકાદાસ શેઠ ઈન્ટરનેશનલે લેટર ઓફ ક્રેડિટ હેઠળ કેટલીય ક્રેડિટ ફે‌િસલિટીનો લાભ ઉઠાવ્યો છે. એવું કહેવાય છે કે સીબીઆઈએ આ ફરિયાદ છ મહિના સુધી દબાવી રાખી હતી.

You might also like