BRTSના જનમિત્રકાર્ડ માટે આધારકાર્ડ ફરજિયાત નથી

અમદાવાદ: ગઇ કાલે મ્યુનિસિપલ કમિશનર વિજય નહેરાએ આજથી એક મહિના સુધી નાગરિકોને બીઆરટીએસના જનમિત્રકાર્ડ મફત અપાશે તેવી જાહેરાત કરી હતી. મ્યુનિસિપલ સત્તાધીશો દ્વારા ડિજિટલ ઇન્ડિયાના ભાગરૂપે તંત્રમાં કેશલેસ વ્યવહારોને પ્રોત્સાહન આપવાની દિશામાં આવો મહત્ત્વનો નિર્ણય કરતાં ઉતારુઓમાં આનંદની લાગણી ફેલાઇ છે. આ ઉપરાંત જનમિત્રકાર્ડ કઢાવવા માટે ઉતારુ માટે આધારકાર્ડ પણ ફરજિયાત નથી.

મ્યુનિસિપલ કમિશનર વિજય નહેરાએ ગઇકાલે પત્રકારો સાથેની વાતચીતમાં જણાવ્યું હતું કે જનમિત્રકાર્ડ કઢાવવા માટે જે તે ઉતારુએ ઓળખ માટે આધારકાર્ડનો પુરાવો આપવો ફરજિયાત નથી. પોતાની ઓળખ તરીકે વોટરકાર્ડ, ડ્રાઇવિંગ લાઇસન્સ, પાનકાર્ડ વગેરે પણ આપી શકાશે.

કમિશનર વિજય નહેરાની જાહેરાતના પગલે ઉતારુને વ્યકિતગત ફોટા સાથેના રૂ.૭પના જનમિત્રકાર્ડ અને સાદા ફોટા વગરના કાર્ડ માટે રૂ.પ૦ની ચૂકવણી આગામી તા.૩૦ સપ્ટેમ્બર સુધી કરવાની રહેશે નહીં, પરંતુ તદ્દન મફતમાં કાર્ડ અપાશે. જોકે જનમિત્રકાર્ડની ઘરે બેઠા ડિલિવરી પેટે રૂ.રપ ચૂકવવાના રહેશે.

જાણકાર સૂત્રો કહે છે કે અત્યાર સુધી બીઆરટીએસના ૬૩,૦૦૦ ઉતારુએ જનમિત્રકાર્ડ કઢાવ્યા છે. બીઆરટીએસના જનમિત્રકાર્ડધારકને ભાડામાં ૧૦ ટકા અને વિદ્યાર્થીઓને ૪૦ ટકા રાહત આપવાની પણ જાહેરાત કરાઇ છે.

દરમિયાન એએમટીએસ સત્તાવાળાઓ દ્વારા આજથી બીઆરટીએસ કોરિડોરમાં વધુ સાત રૂટની વધુ પપ બસને દોડતી કરવાની જાહેરાત કરાઇ છે. રૂટ નં.ર૮, ર૮ શટલ, રર/૧, ૪૬, ૪૭, ૯૬, ૧ર૮ અને ૧૩પ આજથી જ્યાં બીઆરટીએસ કોરિડોર હશે ત્યાં કોરિડોરમાંથી અને જ્યાં બીઆરટીએસ કોરિડોર નથી ત્યાં મિકસ ટ્રાફિકમાંથી સંચાલિત થશે.

You might also like