ચાલુ વર્ષે કપાસના ઉત્પાદનમાં ૧૧ ટકા ઘટાડાનો અંદાજ

અમદાવાદ: કપાસના વાવેતર વિસ્તારમાં થઇ રહેલા ઘટાડાના કારણે કપાસની ઉપજ ઘટી છે. ચાલુ વર્ષે દેશમાં કપાસના ઉત્પાદનમાં ૧૧ ટકાનો ઘટાડો નોંધાઇ ૩૩૫ લાખ ગાંસડીનું ઉત્પાદન થવાનું અનુમાન છે. એડલવાઇસ એગ્રી રિસર્ચના એક રિપોર્ટ અનુસાર ચાલુ વર્ષે કપાસનું ઉત્પાદન ૩૩૫ લાખ ગાંસડી રહેવાનું અનુમાન છે, જે પાછલા વર્ષની સરખામણીએ ૧૧ ટકા ઓછું રહેવાનો અંદાજ છે. પાછલા વર્ષે ૩૭૬.૬ લાખ ગાંસડીનું ઉત્પાદન થયું હતું.

રિપોર્ટમાં જણાવ્યા પ્રમાણે ઓછા વરસાદના કારણે કપાસની ખેતીના વાવેતર વિસ્તારમાં ઘટાડો થયો છે, જેના કારણે ઉત્તર ભારતનાં રાજ્યમાં નીપજમાં ઘટાડો થયો છે. આ રાજ્યમાં આવકમાં ૩૫ ટકાનો ઘટાડો થયો છે. દરમિયાન સ્થાનિક જાણકારોના જણાવ્યા પ્રમાણે પાકિસ્તાનમાં ભારતીય કપાસની માગમાં સુધારો નોંધાયો છે. ઓક્ટોબર-નવેમ્બર મહિનાના સમયગાળા દરમિયાન એક અંદાજ મુજબ ૧૮ લાખ કોટન બેલ્સની નિકાસ કરવામાં આવી છે.

You might also like