દક્ષિણ ચીન સમુદ્રમાં અમેરિકાનાં બે યુદ્ધ જહાજ દેખાઈ દેતાં તણાવ વધવાની શક્યતા

વોશિંગ્ટન: અમેરિકાનાં બે યુદ્ધજહાજ દક્ષિણ ચીન સાગરના વિવા‌િદત સમુદ્રમાં જોવા મળ્યાં હત્યાં. આ સમુદ્રી વિસ્તાર પર ચીન પોતાનો દાવો કરતું રહ્યું છે અને તાઈવાન સાથે પણ તેને આ મુદ્દે વિવાદ છે. અમેરિકાના આ પગલાથી વિવાદ વધે તેવી શક્યતા છે.

ચીને દક્ષિણ ચીન સાગરમાં અમેરિકાનાં બે યુદ્ધજહાજ જોયાં હોવાનો દાવો કર્યો છે. અમેરિકા ઉત્તર કોરિયા મામલે ચીનના સહયોગની માગણી કરી રહ્યું છે તેવા સમયે જ લેવાયેલું આ પગલું ભડકાવનારું કામ કરી શકે છે. અમેરિકાનું આ ઓપરેશન બી‌િજંગના એ પ્રયાસનો જવાબ ગણવામાં આવે છે, જે અંતર્ગત તે આ રણનૈતિક ક્ષેત્રમાં જહાજની અવરજવરને અસર પહોંચાડવા માગે છે.

મિસાઈલ ડિસ્ટ્રોયર અને ગાઈડેડ મિસાઈલ ક્રૂઝર પાર્સલ આઈલેન્ડથી માત્ર ૧૨ નોટિકલ માઈલ જ દૂર હતાં

અમેરિકાએ આ ઓપરેશનની યોજનાઓ અનેક મહિનાઓ પહેલાં બનાવી હતી અને હવે તે રો‌િજંદી બની ગઇ છે. અમેરિકાના નૌકાદળ તરફથી કરવામાં આવનારા અભ્યાસથી ચીનને બહાર કરવાના કારણે બંને દેશો વચ્ચેના સંબંધોમાં કડવાશ ઊભી થઈ છે અને આવા સમયે દક્ષિણ ચીન સાગરમાં અમેરિકી યુદ્ધજહાજોની હાજરી ચિંતાજનક બાબત છે. નામ ન જણાવવાની શરતે એક અધિકારીએ જણાવ્યું હતું કે મિસાઈલ ડિસ્ટ્રોયર અને ગાઈડેડ મિસાઈલ ક્રૂઝર પાર્સલ આઈલેન્ડથી માત્ર ૧૨ નોટિકલ માઈલ જ દૂર હતાં.

આ ઓપરેશન પર ટીકાકારોનું કહેવું છે કે અમેરિકાના આ વ્યવહારની ચીન પર વધારે અને લાંબી અસર નહીં થાય, કારણ કે તેનું મહત્ત્વ પ્રતિકાત્મક જ છે, જ્યારે અમેરિકાની સેનાની દુનિયામાં અનેક ઠેકાણે હાજરી છે અને તે આવાં ઓપરેશન ચલાવતું જ રહે છે. અમેરિકાના સહયોગીઓના દાવા ધરાવતા વિસ્તારમાં પણ તેની હાજરી હોય જ છે, જોકે તેનો રાજનૈતિક ઉદ્દેશ સાથે કોઈ સીધો સંબંધ રહ્યો નથી. ૧૨ મેએ સેટેલાઈટ દ્વારા લેવામાં આવેલી તસવીરોમાં જણાઈ આવે છે કે ચીને જમીનથી હવામાં વાર કરવામાં સક્ષમ મિસાઈલ અને એન્ટિ શિપ ક્રૂઝ મિસાઈલ વુડી આઈલેન્ડમાં તહેનાત કરી છે.

You might also like