શ્રાવણના છેલ્લા શનિવારે હનુમાનજીના હિંડોળા

વડોદરા : પવિત્ર શ્રાવણ માસનો આજે અંતિમ શનિવાર હોઇ. શહેરના હનુમાન મંદિરોમાં સંકટ મોચન મારૃતિ નંદનના દર્શન કરવા ભક્તોનું ઘોડાપૂર ઉમટ્યું હતું. શહેરના હનુમાન મંદિરોમાં આજે વહેલી સવારથી જ હનુમાનજીની પૂજા- અર્ચના તથા આરતી માટે લાંબી કતારો લાગી ગઇ હતી. હનુમાન મંદિરમાં અખંડ રામધૂન, હનુમાન ચાલીસા તથા સુંદરકાંડના કાર્યક્રમો પણ થયા હતા. હનુમાનજીના મંદિરો જયશ્રી રામના નારાઓથી ગૂંજી ઊઠ્યા હતા.

પવિત્ર શ્રાવણ માસનો છેલ્લો શનિવાર હનુમાન ભક્તો માટે વિશેષ મહત્વ ધરાવતો હોઇ આજે વહેલી સવારથી જ દાદાની પૂજા અર્ચના માટે તેલ, આંકડા, ફુલની માળા, સિંદૂર જેવી પૂજા સામગ્રી સાથે મંદિરોમાં પહોંચી ગયા હતા. જ્યારે શહેરના કેટલાક પૌરાણિક હનુમાન મંદિરોમાં હોમ, હવન, મહાપ્રસાદી તથા મહાઆરતીના વિવિધ ધાર્મિક કાર્યક્રમો યોજવામાં આવ્યા હતા.

શહેરના હરણી વિસ્તારમાં આવેલ ભીડભંજન હનુમાનજીના મંદિરે વહેલી સવારથી જ ભક્તોની કતારો દર્શનાર્થે લાગી ગઇ હતી. વર્ષોની પરંપરા અનુસાર હરણીના હનુમાન મંદિરે મેળો પણ યોજાયો હતો. જ્યારે સસયાજીગંજ વિસ્તારમાં પંચમુખી હનુમાનજીના મંદિરે, સુરસાગર તળાવના કિનારા સ્થિત હઠીલા હનુમાન, નવાબજાર સ્થિત રોકડનાથ મંદિરે તથા વાડી વિસ્તારમાં સૂર્યમુખી હનુમાનજીના મંદિરે તથા શહેરના અન્ય મંદિરોમાં ભક્તોનો ભારે ધસારો જોવા મળ્યો હતો.

શહેરની સયાજી હોસ્પિટલમાં સારવાર લઇ રહેલા દર્દીઓનું સ્વાસ્થ્ય સુધરે અને તેઓ વહેલી તકે ફરી પાછા તંદુરસ્ત બની સામાન્ય જીવન જીવતા થાય તેવા શુભ હેતુથી હોસ્પિટલના સ્ટાફ તથા સુપ્રિટેન્ડન્ટ ડો. રાજીવ દેવેશ્વરે સયાજી હોસ્પિટલના અધિક્ષકની કચેરી ખાતે સત્યનારાયણની કથાનું આયોજન કરવામાં આવ્યું હતું. શહેરમાંથી અસંખ્ય લોકો છેલ્લો શનિવાર હોવાથી ઝંડ હનુમાન અને સારંગપુર દર્શનાર્થે ગયા હતા.

You might also like