પોર્ન સાઈટો ઉપર તાકીદે પ્રતિબંધ ફરમાવવા મહિલા વકીલોની માંગ

નવી દિલ્હીઃ મોદી સરકારે ૮૫૭ જેટલી પોર્ન સાઈટો ઉપર ફરમાવેલો પ્રતિબંધ ઉઠાવી લીધાના એક મહિના બાદ આ મામલે સુપ્રીમ કોર્ટના મહિલા વકીલોએ નવેસરથી મોરચો ખોલ્યો છે. સુપ્રીમ કોર્ટના વિમેન લોયેર્સ એસોસીએશન દ્વારા સુપ્રીમ કોર્ટ સમક્ષ પોર્ન સાઈટોના મામલે ઉઠાવાયેલા પ્રતિબંધ વિશે નવેસરથી વિચારણા કરવા ડાયરેકશન માંગ્યુ છે. 

ઈન્દોર સ્થિત એડવોકેટ કમલેશ વાસવાણીએ દાખલ કરેલી પિટિશનમાં પક્ષકાર તરીકે મહિલા એસોસીએશને જોડાવાની માગણી કરતા કોર્ટ સમક્ષ રજૂઆત કરી હતી કે, હવે મામલો ગંભીર બનતો જાય છે.

સ્કૂલે જતા છોકરા-છોકરીઓ હવે સ્કૂલ બસમાં અને તેમને લાવતા લઈ જતા ખાનગી વાહનોમાં પોર્ન ક્લિપો એકસેસ કરતા થઈ ગયા છે. આ એસોસીએશને કોર્ટ સમક્ષ માગણી કરી છે કે, દેશની તમામ સ્કૂલોની બસોમાં મોબાઈલ ઝામર લગાવવા આદેશ આપવો જોઈએ. જેને લઈને વિદ્યાર્થીઓ પોર્નોગ્રાફીકસ સાઈટો જોઈ ન શકે. કોર્ટે આ મામલામાં ૧૩ ઓકટોબરે સુનાવણી મુલતવી રાખી છે.

સરળતાથી પોર્ન સાઈટો એકસેસ થઈ શકતી હોવાથી યુવા પેઢીનું મગજ બગડી ગયું છે. બાળકોને લાવતી લઈ જતી બસો અને રિક્ષાના ચાલકો તેમજ કંડકટરોના મોબાઈલમાં પણ પોર્ન ક્લિપો સ્કોર થયેલી જોવા મળે છે. આવી ક્લિપો લોકોમાં સરળતાથી હિચકિચાટ વગર ફરતી થતી હોવાથી વિદ્યાર્થી-વિદ્યાર્થિનીઓની લાગણીઓ અને માનસિકતાને ગંભીર અસર કરે છે. 

ડ્રાઈવરો-કંડકટરો અને સાફ-સફાઈવાળા બાળકોનું શોષણ કરતા થઈ ગયા છે. તેમની પાસેની પોર્ન ક્લિપો બતાવી શોષણ કરવામા આવે છે. સુપ્રીમ કોર્ટના વિમેન્સ લોયર્સ એસોસીએશનના સેક્રેટરી પ્રેરણાકુમારી અને સિનિયર એડવોકેટ મહાલક્ષ્મી પવાની દ્વારા આ દલીલો કોર્ટ સમક્ષ મુકવામાં આવી હતી.

સરળતાથી જોવા મળતી પોર્નોગ્રાફીને લઈને મહિલાઓ, યુવતીઓ, છોકરીઓ અને બાળકોની સાથેના ગુન્હાઓનું પ્રમાણ વધી રહ્યું છે. આ મામલે રાષ્ટ્રીય નીતિ ઘડવાની જરૂર છે અને બાળકોને લગતી પોર્નોગ્રાફીને સખ્તાઈથી અટકાવવા માગણી કરવામાં આવી છે. ઓગષ્ટ ૧૦ના પોતે લાદેલો અગાઉનો પ્રતિબંધ ઉઠાવતા સરકારે કોર્ટ સમક્ષ જણાવ્યું હતું કે, અમે પોર્નોગ્રાફીને બંધ રૂમમાં નિહાળતા કોઈને અટકાવી ન શકીએ. અમે જ્યારે ડિજિટલ ઈન્ડિયા તરફ આગે કદમ માંડી રહ્યા છીએ ત્યારે વેબસાઈટ બ્લોકિંગના આંધળા હુકમો ન કરી શકીએ.  

 

You might also like